فاروق آباد (ایف یو نیوز)پاکستا ن فلاح پارٹی کے مرکزی جنرل سیکرٹری امانت زیب نے کہا ہے کہ پاکستان کی آدھی سے زیادہ آبادی پنجاب میں رہتی ہے جن کی صحت کا کوئی پرسان حال نہیں۔ ملک کی آدھی سے زائد آبادی کی صحت جیسے اہم شعبے کو فنڈنگ کے مسائل کا سامنا ہے جبکہ چند لاکھ افراد کو فائدہ پہنچانے کے لئے اورنج لائن ٹرین جیسے منصوبے پر خطیر رقم خرچ کر دی جا تی ہے جس سے مسلم لیگ ن کی پالیسیوں کے نقائص کا اندازہ لگایا جا سکتا ہے پنجاب میں تسلسل سے سات سال سے اقتدار میں رہنے والے میاں شہباز شریف ابھی تک پنجاب کی عوام کو صحت کی بنیادی سہولیتیں مہیا نہیں کر سکے۔ صوبے میں ڈاکٹروں کے پنجاب حکومت سے تحفظات کسی سے ڈھکے چھپے نہیں۔ وزیر اعلیٰ پنجاب میاں شہباز شریف کا بس نہیں چلتا ورنہ وہ ساری وزارتیں اپنے پاس رکھیں صحت جیسے اہم شعبے کو ایک مشیر کے ذریعے چلایا جا رہاہے۔ مسلم لیگ ن کا طرزِ حکمرانی عوام کے لئے مسائل کھڑے کر رہا ہے لیکن حکمران اپنی کوتاہیوں کو ماننے کو تیار نہیں، ان خیالات کا اظہار انہوں نے صحافیوں سے گفتگو کرتے ہوئے کیا،امانت زیب نے کہا کہ پاکستان فلاح پارٹی فلاح وبہبودکے کاموں میں پیش پیش ہے اور اس کے ملک بھر میں کارکن تمام وسائل بروئے کار لاتے ہوئے عوام کی بھرپور امداد کریں گے۔ حکومت کو عوام کے جانی و مالی نقصانات سے کوئی سروکار نہیں انہیں صرف اپنی حکومت کی فکر ہے۔

QR Code: