فاروق آباد (ایف یو نیوز)ضلعی آرگنائزر (ن)لیگ یوتھ ونگ شیخوپورہ و چیئر مین ایم ۔ ایس ۔ ایف ضلع شیخوپورہ سید اسد علی شاہ بخاری نے کہا ہے کہ مسلم لیگ (ن )کی حکومت حقیقی معنوں میں عوام کی ترجمان ہے کیونکہ (ن)لیگ کی حکومت نے عوامی مفاد اور عوام کی ترقی کی سیاست کی ہے جس کا واضح ثبوت وزیر اعلیٰ پنجاب میاں شہباز شریف کے حالیہ دورہ میں ہونے والے پچاس سے زائد ترقیاتی معاہدے ہیں جن سے پاکستان میں معاشی ترقی مزید بلند ہو گی اور بیرون ملک کے سرمایہ کاروں کا پاکستان پر اعتماد مزید بڑھے گا اور پاکستان کی معیشت مضبوط سے مضبوط تر ہو گی ۔ اسد بخاری نے کہا کہ کرپشن کے خلاف آواز اٹھانے والے در اصل خود کرپشن کے بادشاہ ہیں اوراپنی کرپشن چھپانے کیلئے دھرنے جیسے گندے ہتھ کنڈے استعمال کر رہے ہیں ۔جس کا ثبوت تحریک انصاف کے رہنماء جہانگیر ترین کا قرضہ معاف کروانا ہے ۔انہوں نے کہا کہ جہانگیر ترین نے مشرف دور میں بطور وزیر دس کروڑ ۔ دس لاکھ کا قرضہ معاف کروایا ہے اب عمران خان جہانگیر ترین کے خلاف عدالت کس دن جائیں گے۔ انہوں نے کہا کہ وزیر اعظم میاں نواز شریف کا مسئلہ کشمیر ہر فورم پر اٹھانا خود مختار جمہوریت کی نشانی ہے اور میاں نواز شریف نے مسئلہ کشمیر پر بھارت کو دو ٹوک موقف دے کر کشمیری عوام کے امنگوں کی ترجمانی کی ہے ۔ اپنے ایک بیان میں اسد بخاری نے کہا کہ طاہر القادری اور عمران خان کے دھرنے جیسے ٹوپی ڈراموں سے عوام بخوبی آگاہ ہو چکے ہیں اور دھرنے جیسی گندی سیاست کرنے والوں کو مایوسی کے سوا ء کچھ حاصل نہیں ہو گا۔ ان خیالات کا اظہار سید اسد علی بخاری نے میڈیا سے خصوصی گفتگو کرتے ہوئے کیا۔
