فاروق آباد (سٹاف رپورٹر ) ٹی ایم اے شیخوپورہ اور چیف آفیسربلدیہ کی غفلت اور چشم پوشی کی وجہ سے مین بازار اور اپروچ روڈپر قبضہ مافیا کا راج،نا جائز تجاوزات کی وجہ سے راہ گیرعورتوں،بچوں اور بزرگوں کا گزرنا محال ۔بتایا گیا ہے کہ مین بازار اور اس کے گرد و نواح میں قبضہ مافیا نے اپنی دکانوں کے سامنے اور بازار کے بڑے حصے پر قبضہ کرلیا ہے اکثر دکانداروں نے اپنی دکانوں کا سامان باہر بازاروں میں سجایا ہوا ہے اور باقی دکانداروں نے اپنی دکانوں کے سامنے کی جگہ کرایہ پر دے رکھی ہے جہاں پر گوشت، پھل فروٹ، سبزیوں وغیرہ کی ریڑیاں اور پھٹے لگائے جاتے ہیں جہاں سے گاڑی تو کیا پیدل گزرنا بھی ناممکن ہو چکا ہے دوسری طرف مین بازار کے باہراپروچ روڈ پر رکشوں کی ڈبل ٹرپل قطاریں و دکانوں کے باہر گوشت ،فروٹ وغیرہ کے پھٹوں کی وجہ سے ٹریفک کا جام رہنا معمول بن چکا ہے ،شہریوں کی طرف سے متعدد بار شکایات درج کروانے کے باوجود ان کے خلاف کوئی کاروائی عمل میں نہیں لائی جاتی دوکانوں کے باہر تجاوزات بڑھانے والوں کا موقف ہے کہ وہ ٹی ایم اے کے ملازمین کو بھتہ دیتے ہیں سیاسی سماجی تنظیموں اور شہریوں نے دی سی او شیخوپورہ محترمہ کرن خورشید سے مطالبہ کیا ہے کہ تجاوزات کو ہٹایا جائے اور ملوث ملازمین کے خلاف قانونی کاروائی عمل میں لائی جائے ۔
