چھٹی کلاس کے طالب علم کو تشدد کے بعد سکول کے کمرے میں کئی گھنٹے قید رکھنے پر والدین بطور احتجاج ڈی سی او آفس پہنچ گئے ۔ڈی سی او شیخوپورہ راشد کمال الرحمن نے فوری ایکشن لیتے ہوئے ڈی ایم او شیخوپورہ کو انکوائری کا حکم جاری کردیا ۔فاروق آباد کے علاقہ نئی آبادی مریدکے گاؤں کے رہائشی کانسٹیبل فقیر حسین نے اپنی تحریری درخواست میں بتایا کہ میرا بیٹا ’’محمد نعمان ولد فقیر حسین ‘‘جو کہ کلاس ششم کا طالب علم ہے اور گورنمنٹ پراجیکٹ ہائی سکول کینال کالونی فاروق آباد میں زیر تعلیم ہے گذشتہ دنوں میرے بیٹے کو ماسٹر جاویداقبال نامی ٹیچر نے شدید تشدد کا نشانہ بنایا اور زودو کوب کیا اور بعد ازاں سکول ٹیچر محمد اسلم بلا ،مرغوب اور ڈپٹی ہیڈ ماسٹر نے میرے بیٹے کو 8:45سے 11بجے دوپہرتک سکول کے ایک کمرے میں محبوس(قید) رکھا اور ایک سادہ کاغذ پر زبر دستی دستخط کروالئے ۔واقع کا پتہ چلنے پر میں سکول گیا اور مذکورہ ٹیچرز سے وجوہات پوچھیں تو ٹیچرز نے میرے ساتھ بھی بدتمیزی کی اور ناروارویہ اپنایا درخواست گذار ہمراہ دیگر افرادنے صحافیوں کو بتایا کہ سکول ہذا میں بچوں پر تشد داور والدین سے بد تمیزی روز کا معمول بن چکا ہے ۔سکول ہذا زیرتعلیم بچوں اور والدین کیلئے منی جیل بن چکا ہے والدین کو بچوں کی پراگریس کے لیئے اساتذہ سے ملنے کی اجازت نہ ہے والدین گھنٹوں سکول گیٹ پر کھڑے ہو کر مایوس لوٹ جاتے ہیں اور یہ بھی معلوم ہوا ہے کہ بچوں اور والدین سے سادہ کاغذ پر دستخط لیئے جاتے ہیں تاکہ دیگر ٹیچرز کے خلاف کاروائیوں اور درخواست بازی کیلئے استعمال کیا جاسکے ۔ غریب والدین کو دھمکایا جاتا ہے کہ آپ کے بچوں سکول سے نکال دیا جائے گا جس سے وہ ڈرتے ہوئے اعلیٰ حکام کو کمپلینٹ بھی نہیں کرتے مذکورہ ٹیچرز پر مختلف مقدمات اور درخواستیں انکوائریاں چل رہی ہیں لیکن ای ڈی او ایجوکیشن میاں طارق رفیق سے رفاقت ہونے کی وجہ سے ان ٹیچرز کے خلاف کوئی کاروائی عمل میں نہ لائی گئی ہے متاثرہ والدین نے وزیر اعلیٰ پنجاب میاں شہباز شریف ،وزیر تعلیم ،سیکرٹری تعلیم ،ڈی سی او شیخوپورہ سے اپیل کی ہے کہ مذکورہ سکول ٹیچر کے خلاف محکمانہ کاروائی کرکے قرار واقع سزادی جائے ۔
