وطن عزیز کی مشکلات کے حل کیلئے قائد و اقبال کے افکار سے رہنمائی لینے کی ضرورت ہے : منظور حسین
فاروق آباد (ایف یو نیوز)گورنمنٹ بوائز ڈگری کالج کے پرنسپل چوہدری منظور حسین نے ’’نظریہ پاکستان اور جدید تقاضے : فکر اقبال کی روشنی میں ‘‘ کے حوالے سے منعقد ہونیوالے سیمینار سے خطاب کرتے ہوئے کہاکہ مفکر پاکستان نے برصغیر کے مظلوم مسلمانوں کے لئے ایک الگ وطن کا خواب دیکھا ۔ ان کی شاعری نے مسلمانوں میں انقلابی روح بیدار کی جس کی بدولت آج ہم آزاد فضاوں میں سانس لے رہے ہیں ۔ان کا کہناتھا کہ آج وطن عزیز جن مشکلات سے دوچار ہیں ان کے حل کے لئے قائد و اقبال کے افکار سے رہنمائی لینے کی ضرورت ہے ۔ اس موقعے پر خطاب کرتے ہوئے پروفیسر ندیم شاہد نے کہا کہ جدید دور کے چیلنجز کا مقابلہ کرنے کے لئے آج ہماری نوجوان نسل کو اقبال کے افکار سے روشناس کرانے کے لئے اساتذہ اہم کردار ادا کر سکتے ہیں ۔ انہوں نے طلباء پر زور دیا کہ وہ علامہ اقبال کی شاعری کا مطالعہ کریں تاکہ ان میں ملت اسلامیہ سے محبت کا جذبہ بیدار ہو ۔ تقریب میں پروفیسرعقیل عارف ،پروفیسر اشفاق تابش، پروفیسریوسف مغل نے علامہ اقبال کی شخصیت کے مختلف پہلووں پر روشنی ڈالی ۔ اس موقعے پر طلباء ، معزز اساتذہ کرام اور معززین علاقہ کی ایک بڑی تعداد نے بھی شرکت کی ۔
Leave a Reply