نمایاں پوزیشن حاصل کرنے والے طلباء و طالبات کی حوصلہ افزائی اور انفارمیشن ٹیکنالوجی میں کارہائے نمایاں سر انجام دینے کے مواقع فراہم کرنے کے لئے وزیرِ اعلیٰ پنجاب محمد شہباز شریف کی خصوصی سیکم کے تحت لیپ ٹاپ تقسیم کرنے کی پر وقار تقریب گورنمنٹ پوسٹ گریجویٹ کالج برائے خواتین میں منعقد ہوئی۔ تقریب میں ضلع شیخوپورہ اور ضلع ننکانہ صاحب سے تعلق رکھنے والے 3329 طلباء و طالبات میں جدید لیپ ٹاپ تقسیم کئے گئے۔ لیپ ٹاپ تقسیم کرنے کی تقریب میں رکن قومی اسمبلی میاں جاوید لطیف، ارکان پنجاب اسمبلی حسان ریاض، فیضان خالد ورک اور مسلم لیگ ن ضلع شیخوپورہ کے جنرل سیکرٹری شیخ کاشف عارف، سٹی صدر طیاب راشد سندھو ایڈووکیٹ ، ملک پرویز اقبال ،ایڈیشنل ڈسٹرکٹ کلکٹر سیدہ کلثوم حئی ،پرنسپل مسز یاسمین ،اساتذہ ،طلبہ اور والدین کی بڑی تعداد نے شرکت کی۔ اس موقع پر پنجاب پولیس کے چاک و چوبند دستے نے طلباء و طالبات کو گارڈ آف آنر پیش کیا اور سلامی دی۔
