فاروق آباد: ” بیساکھی میلہ” میں شرکت کیلئے بھارت سمیت دنیا بھر سے پاکستان آئے ہوئے 1317 سکھ یاتریوں نے فاروق آباد میں گوردوارہ سچاسودا کی یاترا کی اورمتھاٹیکنے سمیت اپنی دیگر مذہبی رسومات ادا کیں،اس موقع پرسکھ یاتری “سو بولے نہال،گورو جی کا خاصہ، گورو جی کی خیر ” کے نعرے لگاتے رہے۔سکھ یاتریوں نے گوردوارہ میں ماتھا ٹیکا، گربانی وچار، اشنان کی مذہبی رسومات کیں اور پر شاد بھی بانٹا۔ بھارتی سکھ یاتریوں کے پارٹی لیڈر سردار امریک سنگھ نے کہاکہ حکومت پاکستان نے ہمارے لئے بہت اچھے انتظامات کئے ہیں،پاکستانی حکومت ہمارے مذہبی مقامات کی بڑے اچھے طریقے سے دیکھ بھال کررہی ہے اس موقع پرسکھ یاتریوں نے صحافیوں سے گفتگو کرتے ہوئے کہا نوازشریف پاکستان کے مقبول ترین لیڈر ہیں اسی لئے وہ تیسری بار “پرتان منتری”(وزیر اعظم)بنے ہیں ،ہماری ان سے اپیل ہے کہ دونوں ممالک کے درمیان ویزا سسٹم ختم کر دیں۔ سکھ یاتری جو گندرسنگھ نے کہاکہ پاکستان اور بھارت کے درمیان کرکٹ میچ ہو تو بھارت میں گلیاں محلے سنسان ہو جاتے ہیں، ورلڈ کپ میں پاک انڈیا میچ دیکھنے کا بہت مزہ آیا۔ ، پاکستانی کرکٹرزمیں ہمیں شاہدآفریدی بہت پسندہے مگر اس بار وہاب ریاض نے آسٹریلیا کے خلاف جو باؤلنگ کی اسکا بہت لطف آیا۔ ہیں۔ سکھ یاتری سرجیت سنگھ کہاکہ بھارت کی نسبت پاکستان میں اچھی پنجابی بولی جاتی ہے۔ہم انٹرنیٹ پرپاکستانی ریڈیوچینلزکے پنجابی پروگرام سنتے ہیں۔گلجیت کور نے کہا کہ پاکستان پیار کرنے والوں کا ملک ہے،جتنا پیار ہمیں یہاں آ کر ملتا ہے، اتنا دنیا میں کہیں اور نہیں ملتا۔ گوپندر سنگھ نے کہا کہ پاکستان میں ہمارے گوردواروں کی اتنی اچھی دیکھ بھال دیکھ کر دل بہت خوش ہوا ہے ،ہم حکومت پاکستان کے بہت شکر گزار ہیں۔