فاروق آباد : پنجاب ایگزامینیشن کمیشن کے تحت ہونے والے گریڈ 5 کے امتحان میں ضلع شیخوپورہ کا رزلٹ 38فیصد اور گریڈ 8 کا رزلٹ 46.5 فیصد رہا۔ جبکہ پنجاب بھر کا گریڈ 5 کا رزلٹ 59.4 فیصد اور گریڈ 8 کا رزلٹ67 فیصد رہا،اس لحاظ سے ضلع شیخوپورہ کاگریڈ 5 کا ر رزلٹ انتہائی مایوس کن تھا۔ ضلعی محکمہ تعلیم نے 10 سے20 فیصد تک رزلٹ دینے والے سکولز کے سربراہان اور کلاس ٹیچرز کے خلاف کاروائی کا فیصلہ کیا ہے ،10فیصد رزلٹ دینے والے سکولز کے سربراہان اور کلاس ٹیچرز کے خلاف پیڈا ایکٹ کے تحت کاروائی عمل میں لائی جائے گی۔ جبکہ 20 فیصد تک رزلٹ دینے والے سکولز کے سربراہان اور کلاس ٹیچرز کو شو کاز نوٹس جاری کئے جائیں گے۔ جبکہ ناقص رزلٹ کے باعث سکولز ٹیچرز سے اضافی ڈیوٹیاں (جن میں پولیو کے قطرے پلانا، ڈینگی آگاہی مہم وغیرہ ) نہ لینے کا فیصلہ بھی کیا گیا ہے۔اساتذہ کا کہنا ہے کہ اضافی ڈیوٹیوں کی وجہ سے وہ بچوں کو مکمل طور پر تدریسی وقت نہیں دے پاتے۔ جبکہ امتحان سے صرف دو ماہ قبل امتحانی پرچوں کا فارمیٹ تبد یل کر دینا بھی رزلٹ اچھا نہ ہونے کی ایک وجہ ہے۔سارا سال بچوں کو پرانے فارمیٹ سے پڑھانے کے بعد اچانک نیا فارمیٹ بچے قبول نہیں کر سکے۔ ضلع شیخوپورہ کی تحصیل شیخوپورہ کا ایک سکول ایسا بھی ہے جس کا گریڈ 5 کا رزلٹ صرف 1.3فیصد رہا۔گورنمنٹ مڈل سکول جھامکے کے گریڈ 5 کے امتحان میں 145 بچے شریک ہوئے ،جن میں سے 143 بچے فیل ہو گئے،اور جو صرف دو بچے پاس ہوئے ، وہ بھی رعایتی نمبروں پر پرموٹ کئے گئے ہیں۔ایک بچے کے نمبر197اور دوسرے بچے کے نمبر 278ہیں۔
