ریلوے انتظامیہ نے لاہور سے فیصل آباد چلنے والی ٹرینوں 113اَپ اور114ڈاؤن غوری ایکسپریس کے سٹاپس فاروق آباد ریلوے سٹیشن پر بحال کر دیئے ہیں اور اب غوری ایکسپریس فاروق آباد اسٹیشن پر دو منٹ رک کر جایا کرے گی۔کل غوری ایکسپریس کے فاروق آباد ریلوے سٹیشن پر رکنے پر شاندار استقبال کیا گیا۔اس موقع پر عوامی اجتماع سے خطاب کرتے ہوئے سردار عرفان ڈوگر نے کہا کہ فاروق آباد ریلوے اسٹیشن پر غوری ایکسپریس کے سٹاپ سے علاقہ کی پانچ لاکھ سے زائد کی آباد ی مستفید ہوگی اور علاقہ کی عوام کو ان کی دہلیز پر سستے سفر کی سہولیات میسر ہونگی۔ اس خصوصی تقریب میں مرکزی صدر ماں فاؤنڈیشن سیٹھ افتخار احمد ،سیدتقی رضاشا ہ بخاری ،ڈاکٹر محمد علی قیصرؔ ، چوہدری شہباز احمد گھمن، اعجاز قادر چیمہ ،سردار سرفراز ڈوگر ،ملک ارشاد ،سردار خادم ڈوگر ،یاسر بلہی ،ملک آصف اور سینئر نائب صدر پریس کونسل چوہدری عدیل احمد ورک سمیت شہریوں کی کثیر تعداد نے شرکت کی۔ اہل علاقہ نے فاروق آباد ریلوے اسٹیشن پر سٹاپ کی منظوری پر خوشی کا اظہار کیا، وفاقی وزیر ریلوے خواجہ سعد رفیق اور ریلوے انتظامیہ کا شکریہ ادا کیا اور رکن اسمبلی سردار محمد عرفان ڈوگر کی سماجی خدمات اور انسان دوست پالیسیوں پر انہیں خراج تحسین پیش کیا ،جن کی کاوشوں سے غوری ایکسپریس کا سٹاپ بحال کیا گیا۔