فاروق آباد : کوئی بھی معاشرہ انصاف کے بغیر قائم نہیں رہ سکتا عوام کو ان کی دہلیز پر انصاف کی فراہمی اورضلع کو کرپٹ عناصر سے پاک کرنا اولین ترجیحات میں شامل ہے۔ان خیالات کا اظہار ایس پی انویسٹی گیشن رانا محمد ممتاز نے اپنے دفتر میں سید تقی رضا بخاری ، سیٹھ افتخار احمد کی قیادت میں پریس کلب فاروق آباد کے وفدسے گفتگو کرتے ہوئے کیا۔انہوں نے کہا کہ مقدمات کا غلط اندراج اور اخراج انصاف کی فراہمی میں رکاوٹ بنتا ہے شفافیت اور میرٹ سے نہ صرف مظلوم کی دادرسی ہوتی ہے بلکہ اس سے انصاف کا بول بالا بھی قائم ہوتا ہے مقدمات کا غلط اندراج اور اخراج میری ڈکشنری میں شامل نہیں ۔ضلع بھر کے تمام انویسٹی گیشن آفیسرز کو اس بات کی خصوصی ہدایت کی گئی ہے کہ وہ میرٹ اور شفافیت کو اپنا طرہ امتیاز بنائیں مظلوم کی داد رسی کو یقینی بنانے کیلئے اپنے تمام تر محکمانہ وسائل کو بروئے کار لایا جائے ناقص تفتیش کرنیوالے تفتیشی آفیسرز اپنا قبلہ درست کرلیں وگرنہ ان کے خلاف سخت تادیبی کاروائی کے علاوہ انہیں حوالات یاترا بھی کرنا پڑیگی انہوں نے مزید کہاکہ ضلع بھر کے تھانوں میں ٹاؤٹوں کا داخلہ پر پابندی عائد کردی گئی ہے کیونکہ تھانوں کے ٹاؤٹ درحقیقت انصاف کے قاتل ہیں معززین کیلئے میرے دفتر سمیت ضلع بھرکے تمام تھانوں کے دروازے 24 گھنٹے کھلے ہیں ۔
