فاروق آباد: دہشت گردوں کے ناپاک ارادوں کو تعلیمی جہاد سے ہی ناکام بنایا جا سکتا ہے، سکیورٹی کے نام پہ چھٹیاں ہی چھٹیاں اچھی پالیسی نہیں ہے، ان خیالات کا اظہار ڈاکٹر ایم اے قیصرؔ چیئرمین آف قیصر ایجوکیشن ڈویلپمنٹ آرگنائزیشن نے میڈیا سے گفتگو کرتے ہوئے کیا۔ انہوں نے کہا کہ سانحہ پشاور کے بعد پہلے وفاقی حکومت نے تعلیمی اداروں کی چھٹیاں بڑھائیں پھر حکومت پنجاب نے بھی اس کی پیروی کرتے ہوئے چھٹیوں میں اضافہ کر دیا۔ پاکستان کے تعلیمی اداروں میں پہلے ہی پڑھائی کے دن کم اور چھٹیوں کے دن بہت زیادہ ہیں ۔ بات بات پر تعلیمی ادارے بند کر دئیے جاتے ہیں۔ جس سے اندازہ ہوتا ہے کہ حکومت کے نزدیک تعلیم کی اہمیت بہت کم ہے۔ اچانک تعطیل کے اعلان سے بعض اوقات صبح سویرے بروقت اطلاع نہ ملنے کی وجہ سے طلباء کی اکثریت تعلیمی اداروں میں پہنچ جاتی ہے، واپسی میں شدید مشکلات کے علاوہ والدین میں خوف و ہراس بھی پھیلتا ہے ۔ اس طرح تعطیلات سے طلباء کا مستقبل بھی داؤ پہ لگا ہوا ہے، ان کا تعلیم کا حرج ہو رہا ہے اور پرائیویٹ تعلیمی اداروں کے اساتذہ بھی معاشی طور پر بدحالی کا شکار ہو رہے ہیں۔ پشاور میں تو سانحے کے تین دن بعد سکول کھل گئے تھے، دیگر شہروں میں اس بات کی کیا ضمانت ہے کہ چھٹیوں میں اضافے کے بعد تحفظ و سلامتی کے ادارے اپنے فرائض کی ادائیگی میں سو فیصد کامیاب رہیں گے۔ یوں سکیورٹی کے نام پہ چھٹیاں بڑھاتے جانا، اس سے حکومت کی بزدلی اور تعلیم کی اہمیت کی کمی ظاہر ہوتی ہے۔ حکومت کو چھٹیاں میں اضافہ کرنے کی بجائے تعلیمی اداروں کو تحفظ فراہم کرنے کی پالیسی مرتب کرنی چاہئے۔
