فاروق آباد( سٹاف رپورٹ) فاروق آباد ساؤتھ اور سچا سودا سب ڈویژن کے علاقوں میں ٹرانسفارمر جل جانے سے 36 گھنٹوں سے بجلی کی فراہمی معطل ہونے سے علاقہ مکین بلبلا اٹھے صارفین بجلی کی بندش اورغیر علانیہ لوڈ شیڈنگ کی وجہ سے سخت گرمی میں شدید اذیت کا شکار ہو کر رہ گئے، بتایا گیا ہے کہ لاری اڈہ ،اسلام پورہ ،لاہور سرگودھا روڈ اوراسکی ملحقہ آبادیوں میں ٹرانسفارمر جل جانے سے بجلی کی فراہمی فراہمی معطل ہوگئی، جو کہ 36 گھنٹے گزر جانے کے بعد بھی بحال نہ ہوسکی ،جبکہ مین بازار اور محلہ صدیقی حیدری کے ٹرانسفارمر بھی جل گئے ،جس سے مین بازار سمیت محمد بن قاسم روڈ،غلہ منڈی اپروچ روڈ کے علاقوں کی بجلی دس گھنٹے تک بند رہی۔جبکہ محلہ صدیقی حیدری کے ٹرانسفارمر کے جل جانے سے40گھنٹے بجلی بند رہی ،ساؤتھ سب ڈویژن کے ایس ڈی او حبیب الرحمان سے جب بھی ملنے کی کوشش کی گئی تو پتہ چلا کہ ان کے پاس خانقاہ ڈوگراں کا اضافی چارج ہے شہریوں نے احتجاج کرتے ہوئے ایسے افسران کے خلاف کاروائی کا مطالبہ کیا ہے۔
