فاروق آباد :خسرہ انتہائی خطرناک بیماری ہے، بروقت علاج نہ کروانے کی صورت میں بچہ نمونیا اور اسہال کے باعث موت کا شکار بھی ہو سکتا ہے۔ خسرہ سے بچاؤ کی خصوصی مہم 26 جنوری 2015ء سے 09فروری 2015 ء تک جاری ہے۔ عموماً بچوں کے حفاظتی ٹیکہ جات کے پروگرام کے تحت بچے کو 9ماہ اور 15ماہ کی عمر میں خسرہ سے بچاؤ کے حفاظتی ٹیکے لگائے جاتے ہیں لیکن جہاں پہ خسرہ کے پھیلنے کا خدشہ زیادہ ہو وہاں پہ خصوصی مہم کے ذریعے 6ماہ سے 10 سال تک کی عمر کے تمام بچوں کو حفاظتی ٹیکے لگائے جاتے ہیں۔ اس خصوصی مہم کے تحت فاروق آباد کے نواحی گاؤں بھنڈور، یو سی 93 میں ڈاکٹر محمد علی قیصرؔ چیف ایڈیٹر فاروق آباد اَپ ڈیٹس و چیئرمین زکوٰۃ و عشر کمیٹی، بھنڈور کی رہائش گاہ پر چار رکنی ٹیم جس میں سکلڈ پرسن عبدالرحمن، اسسٹنٹ علی، سوشل موبیلائزرز بشریٰ پروین اور صفیہ بانو نے 275 بچوں کو حفاظتی ٹیکے لگائے۔ چیف ایڈیٹر فاروق آباد اَپ ڈیٹس کے سوال کے جواب میں سکلڈ پرسن عبدالرحمن نے بتایا کہ ہمیں 26جنوری تا 09فروری ، روزانہ 250بچوں کو حفاظتی ٹیکے لگانے کا ٹارگٹ دیا گیا ہے، ہم انشاء اللہ ہر روز اپنا ٹارگٹ اچیو کر رہے ہیں۔ اس سے پہلے ہم قیصر گرلز ہائی سکول، رانا ماڈل سکول ، مسلم ماڈل سکول اور شہباز خان سابقہ ناظم یوسی 93 کے ڈیرے پہ بچوں کو حفاظتی ٹیکے لگا چکے ہیں اور یہ سلسلہ پوری یونین کونسل میں 9فروری تک جاری رہے گا جس میں ہماری ٹیم مختلف جگہوں پر کیمپ لگا کر مجموعی طور پر 2,500 بچوں کو حفاظتی ٹیکے لگانے کا ٹارگٹ پورا کرے گی۔ دورانِ مہم اگر کوئی بچہ ٹیکہ لگنے سے محروم رہ جائے تو اس کو کسی بھی قریبی مرکز صحت یا سرکاری ہسپتال سے مہم کے دوران صبح 9بجے سے شام4 بجے تک بھی حفاظتی ٹیکہ لگوایا جا سکتا ہے۔