فاروق آباد : بجلی کے بعد اب گیس کی لوڈشیڈنگ بھی جاری، بعض علاقوں میں سارا سارا دن گیس بند، روٹی اور نان کی قیمتوں میں اضافہ صارفین کے لیے عذاب سے کم نہیں۔ گرمیوں میں 18،18 گھنٹے بجلی کی لوڈشیڈنگ اور اب سردیوں میں سارا سارا دن گیس کی لوڈشیڈنگ جاری۔ بجلی اور گیس کے بحران نے عوام کی زندگی اجیرن کر دی ہے۔ گیس کی لوڈشیڈنگ کی وجہ سے کئی افراد کو صبح ناشتہ کیے بغیر ہی کام پہ جانا پڑتا ہے ۔ بعض علاقوں میں سارا دن گیس کی بندش کی وجہ سے کئی خاندانوں کو تین وقت کا کھانا ہوٹلوں سے منگوانا پڑتا ہے۔ بعض غریب خاندان اس کی سکت نہیں رکھتے۔ دوسری طرف گیس کی بندش کی وجہ سے تندور مالکان نے ازخود روٹی اور نان کی قیمتوں میں بھی بے تحاشہ اضافہ کر دیا ہے۔ شہریوں نے اعلیٰ حکام سے بجلی اور گیس کی فراہمی کو یقینی بنانے اور لوڈشیڈنگ کا دورانیہ کم کرنے کی اپیل کی ہے۔
