فاروق آباد : نادرا آفس میں گنجائش سے زیادہ سائل ہونے کی وجہ سے خواتین، بوڑھے اور بیمار سائل خوار ہونے لگے، علیحدہ کاؤنٹر بنانے کا مطالبہ، محدود وسائل ہونے کی وجہ سے نادرا کا عملہ اپنی تمام تر صلاحیت کو بروئے کار لاتے ہوئے بھی سائلوں کی ضروریات پوری نہیں کر پاتا، ڈبل شفٹ ہونے کے باوجود بھی کئی سائل قطار میں لگ کے شام تک انتظار کرنے کے بعد بھی مایوس واپس لوٹ جاتے ہیں اور اگلے دن پھر کئی کلومیٹر مسافت طے کرنے اور قطار میں ذلیل و خوار ہونے کے لئے آ نا پڑتا ہے۔ فاروق آباد ضلع شیخوپورہ کا سب سے بڑا قصبہ ہے اور اس کے گردو نواح میں بے شمار گاؤں ہیں ۔ شیخوپورہ نادرا آفس میں شناختی کارڈ یا ب فارم کے حصول کے لئے آئے گئے سائلوں میں سے 40% سائل فاروق آباد یا اس کے گردو نواح کے ہوتے ہیں جن کو شناختی کارڈ کے حصول کے لئے لمبی مسافت طے کر کے کئی کئی چکر نادرا آفس شیخوپورہ کے کاٹنے پڑتے ہیں۔ اہلیانِ فاروق آباد کی وزیرِ اعظم پاکستان، وزیرِ اعلیٰ پنجاب، وزیرِ داخلہ اور چیئرمین نادرا سے اپیل ہے کہ فاروق آباد میں نادرا آفس قائم کیا جائے جس سے شیخوپورہ نادرا آفس کی کارکردگی بھی بہتر ہو گی اور فاروق آباد و گردو نواح کی عوام کو بھی شناختی کارڈ اور ب فارم کے حصول کے لئے پریشانی کا سامنا نہیں کرنا پڑے گا۔

QR Code: