ضلع میں امن و امان کے قیام اور اسکے تسلسل کو برقرار رکھنے کیلئے تمام مذاہب متحد ہو کر ملک دشمن عناصر کے ناپاک عزائم کو خاک میں ملا دیں: راشد کمال
ضلع میں امن و امان کے قیام اور اسکے تسلسل کو برقرار رکھنے کیلئے تمام مذاہب کے اکابرین ،علماء مشائخ اور عظام مذہبی ہم آہنگی کے فروغ کو یقینی بنائیں اور متحد ہو کر ملک دشمن عناصر کے ناپاک اور اینٹی اسٹیٹ عزائم کو خاک میں ملا دیں ۔ان خیالات کا اظہار ڈی سی او شیخوپورہ راشد کمال الرحمٰن نے ڈی سی اوآفس کے کمیٹی روم میں بین المذاہب ہم آہنگی کے فرو غ کیلئے قائم کمیٹی کے اجلاس سے خطاب کرتے ہوئے کیا۔کرسچن کمیونٹی کے اکابرین اینڈریو سرفراز ،راجہ احسان اللہ اور علماء کرام مولانا طاہر جاوید نقشبندی ،قاری عزیز الرحمٰن اور دیگر نے شرکت کی۔ڈی پی او شیخوپورہ افضال احمد کوثر نے اپنے خطاب میں کہا کہ پنجاب حکومت اقلیتوں کے جان و مال کی حفاظت کو اولین ترجیح دیتی ہے اور اس مقصد کیلئے ضلعی انتظامیہ اور پولیس کوئی دقیقہ فروگزاشت نہ چھوڑے گی۔تا ہم مختلف مذاہب کے اکابرین اور رہنماؤں پر کڑی ذمہ داری عائد ہوتی ہے کہ عوام کو متحد رہنے کی تلقین کریں اور کسی دہشت گرد اور تخریب کار عناصر کا آلہ کار نہ بنیں ۔تمام اکابرین نے یقین دلایا کہ امن عامہ کو برقرار رکھنے کیلئے وہ اپنا بھر پور کردار ادا کریں گے۔
Leave a Reply