پاکپتن(ایف یو نیوز)انجمن اصلاح معاشرہ پاکپتن شریف کے زیر اہتمام میونسپل پارک سے نگینہ چوک تک یوم دفاع پاکستان کے موقع پر عزم جہاد ریلی نکالی گئی جس کی قیادت ڈاکٹر اقبال احمد صدر انجمن ہذا کے علاوہ علماء کرام و اساتذہ کرام اور دیگر سماجی و مذہبی رہنماؤں نے کی ۔ شرکاء واک نے پلے کارڈ اور مختلف بینرز اٹھا رکھے تھے ۔ دیگر مقررین کے علاوہ ڈاکٹر اقبال احمد صدر انجمن اصلاح معاشرہ پاکپتن نے شرکا ء ریلی سے سیر حاصل خطاب کرتے ہوئے شہدائے وطن کو زبردست الفاظ میں خراج تحسین پیش کیا۔ انہوں نے کہا کہ افواج پاکستان نے ملکی سلامتی و حفاظت کے لئے اپنی جانوں کے نذرانے پیش کر کے جو تاریخ رقم کی ہے اس کی مثال دنیا میں نہیں ملتی انہوں نے جنرل راحیل شریف کی قیادت میں ضرب عصب کے شہداء کو بھی زبردست الفاظ میں خراج تحسین پیش کیا۔ ڈاکٹر اقبال احمد صدر انجمن نے کہا کہ وقت کا تقاضا ہے کہ پوری قوم کو سیسہ پلائی ہوئی دیوار بن کر ملکی سلامتی ترقی و خوشحالی ، امن و امان کے قیام کے علاوہ ملک میں صالح معاشرے کے قیام اور سماجی اخلاقی برائیوں کے خاتمے ،منشیات و کرپشن اور دہشت گردی کے بڑھتے ہوئے عفریت کے خلاف تجدید عہد کرتے ہوئے عزم جہاد کرنا چاہیے تاکہ وطن عزیز دنیا میں اسلام کا بہترین قلعہ بن جائے۔
