فاروق آباد (ایف یو نیوز) گورنمنٹ ہائر سیکنڈری سکولوں میں سیٹیں کم اور میرٹ ہائی ہونے کی وجہ سے داخلہ نہ مل پانے والے طلباء و طالبات کے والدین کی وزیراعلیٰ پنجاب اور ڈی سی اوشیخوپورہ سے اصلا ح واحوال کی اپیل۔ پرائیویٹ کالجز کی فیس بہت زیادہ ہونے کی وجہ سے غریب والدین کے پاس اپنے بچوں کو سرکاری سکولوں میں پڑھانے کے علاوہ کوئی چارہ نہیں لیکن سرکاری سکولوں میں گنجائش نہ ہونے کی وجہ سے غریب طلبہ وطالبات کا تعلیم جاری رکھنا نا ممکن ہو گیاہے۔ سینکڑوں میٹرک پاس طلباء و طالبات داخلے کیلئے گورنمنٹ ہائر سیکنڈری سکولوں کے چکر کاٹ رہے ہیں، داخلے کے منتظر یہ بچے اور بچیاں گورنمنٹ اداروں میں میرٹ ہائی ہونے کی وجہ سے داخلہ لینے سے محروم رہ جائیں گے۔ سیاسی وسماجی تنظیموں ،اساتذہ،شہریوں اور غریب والدین نے وزیر اعلیٰ پنجاب میاں شہباز شریف،سیکرٹری تعلیم ،ڈی سی او شیخوپورہ میڈم کرن خورشید سے مطالبہ کیا ہے کہ فاروق آباد کے تمام گورنمنٹ ہائر سیکنڈری سکولز کوہدایت کی جائے کہ وہ بلا تفریق تمام بچوں اور بچیوں کو داخلہ دیں۔
