فاروق آباد: گزشتہ روز فاروق آباد اَپ ڈیٹس کی پہلی سالگرہ منائی گئی جس میں کالم نگار، تجزیہ نگاراور صحافیوں کی کثیر تعداد نے شرکت کی۔ تقریب سے خطاب کرتے ہوئے بانی و چیف ایڈیٹر ڈاکٹر ایم اے قیصرؔ نے کہا کہ میں اپنی پوری ٹیم ،تمام نمائندگان و کالم نگار اور ان دوستوں کا شکریہ ادا کرنا چاہوں گا جنہوں نے فاروق آباد اَپ ڈیٹس کو اس مقام تک پہنچانے میں میرا ساتھ دیا۔ فاروق آباد اَپ ڈیٹس کا مقصد اُردو ادب کی ترویج، علوم و فنون، ابلاغِ عامہ اور صحافت کو فروغ دینا ہے۔بلاشبہ پچھلے چند سالوں میں سوشل میڈیا نے بہت ترقی کی ہے، آج کا دور سوشل میڈیا کا دور ہے، انٹر نیٹ کے ذریعے پل بھر میں خبر پوری دنیا میں گردش کر جاتی ہے۔کالم نگاروں، تجزیہ نگاروں کے لئے یہ ایک عمدہ پلیٹ فارم ہے، ملک کے کئی نامور اور کئی نومولود کالم نگار اپنے کالم فاروق آباد اَپ ڈیٹس پہ شائع کروا چکے ہیں۔ اس پلیٹ فارم پہ جہاں نامور کالم نگاروں کو عزت بخشی جاتی ہے وہا ں نو مولود کالم نگاروں کی تحریریں نوک پلک سنوار کے شائع کی جاتی ہیں، جس سے نئے لکھنے والوں کی حوصلہ افزائی ہوتی ہے۔ فاروق آباد اَپ ڈیٹس کے اولین اغراض و مقاصد میں اپنے پیارے شہر فاروق آباد کو پوری دنیا میں پوری آب و تاب کے ساتھ روشناس کروانا بھی شامل ہے، اسی لئے اس کا نام شہر کے نام پہ رکھا گیا ہے۔ انشاء اللہ عنقریب فاروق آباد کے حوالے سے فاروق کی تاریخ، اہم شخصیات کے حالاتِ زندگی، اہم اداروں اور این جی اوز کا تعارف، اہم مقامات کی تصاویر اور ویڈیوز فاروق آباد اَپ ڈیٹس کے صفحوں کی زینت ہو ں گی۔ خبریں اور کالمز و آرٹیکلز کے علاوہ مراسلات، انٹرویوز، خصوصی رپورٹساور تبصرہ کتب کے سلسلے شروع کر دیئے گئے ہیں اور آئندہ چند ماہ میں ویڈیو نیوز کے ساتھ ساتھ خواتین کارنر، سٹوڈنٹس کارنر، اسلامک کارنرآن لائن ای بکس اور آئی کے سلسلے بھی شروع کئے جارہے ہیں۔
