فاروق آباد: ساؤتھ ایشین ہیومن آرگنا ئزیشن کے رکن کاشف منصور احمد بھٹی نے مطالبہ کیا ہے کہ ایمپلائز اولڈ ایج بنیفٹ انسٹی ٹیوشن (ای او بی آئی) کے تحت غریب محنت کشوں کو پنشن میں وفاقی حکومت کے اعلان کے مطابق اضافہ کیا جائے۔ انہوں نے کہا کہ وفاقی حکو مت کی جانب سے ریٹائرد محنت کشوں کی پنشن بڑھا کر 6000 کرنے کے باوجود ان کو مبلغ3600 روپے ہی ادا کیے جا رہے ہیں جو ان محنت کشوں کے ساتھ سراسر زیادتی اور نا انصافی ہے۔انہوں نے کہا کہ محنت کشوں کی پنشن کے سلسلے میں وفاقی بجٹ میں وفاقی وزیر خزانہ اسحاق ڈار نے غریب مزدوروں کی پنشن بڑھا کر مبلغ6000 روپے کرنے کا اعلان کیا تھا جبکہ اس سلسلے میں 18 اگست2014 کو ای او بی آئی کی گورننگ باڈی کی میٹینگ میں بھی اس کو منظوری کے بعد حتمی شکل دی گئی تھی جس پر ابھی تک عمل درآمد نہیں کیا جارہا اور نہ ہی کوئی اس میں دلچسپی لے رہا ہے جس کے باعث غریب ریٹائرڈ محنت کشوں میں شدید بے چینی اور مایوسی پائی جا رہی ہے اور وہ اپنے حق کے لیے ای او بی آئی کے دفتروں کے چکر لگارہے ہیں۔
