فاروق آباد سمیت ملک بھر میں جشن عید میلاد النبی ﷺ آج بروز اتوار مذہبی عقیدت و احترام کے ساتھ منائی جائے گی۔ شہر در شہر، قصبوں اور دیہاتوں کے بازار، گلی ، کوچے ’’سرکار کی آمد مرحبا ‘‘ کے نعروں سے گونجیں گے۔ خصوصی مذہبی تقریبات منعقد کی جائیں گی۔ حضور نبی پاکؐ کے یوم ولادت کے سلسلہ میں تمام سرکاری و نیم سرکاری عمارتوں پر چراغاں کر دیا گیا ہے۔ اسی طرح گھروں ،دفاتر، مساجد، پارکوں، تفریحی مقامات، گلیوں، مارکیٹوں، بازاروں، شاہرات کو رنگ برنگ پرچموں، برقی قمقموں، آرائشی محرابوں، خوبصورت فلیکس سائنز، بینرز، جھنڈیوں اور دیگر زیبائشی اشیاء سے سجایا گیا ہے۔ جس سے جشن عید میلاد النبی ﷺ کی خوشیاں اور رونقیں دوبالا ہو گئی ہیں۔ عید میلاد النبی ﷺ کے جلوسوں کے راستوں میں دودھ، شربت کی سبیلیں لگانے، مٹھائی و لنگر تقسیم کرنے کے بھی خصوصی انتظامات کئے گئے ہیں۔ جشن عید میلاد النبیﷺ کے بابرکت، مقدس و پر مسرت موقع پر ملک کی بقاء و سلامتی اور خوشحالی ، سانحہ پشاور کے شہداء کے لئے خصوصی دعائیں مانگی جائیں گی۔ عید میلاد النبی ﷺ کے موقع پر رنگ برنگی جھنڈیوں کو فروخت کیلئے بازاروں اور مارکیٹوں میں سٹال سج گئے ہیں۔ جہاں جشن عید میلاد النبی ﷺ کے حوالے سے مختلف پوسٹرز، جھنڈے، بینرز، ٹوپیاں، سبز پگڑیاں فروخت کے لئے رکھی گئی ہیں۔ محکمہ داخلہ پنجاب نے جشن عید میلاد النبی ﷺ کے موقع پر سکیورٹی کے غیر معمولی انتظامات کئے ہیں اور اس حوالے سے سیکیورٹی پان مکمل کر لیا ہے، جلوس کے راستے پر پولیس کے علاوہ ایلیٹ فورس بھی تعینات کی جائے گی۔
