لاہور بورڈکی داخلہ فیسوں میں اضافہ واپس اور’’ب‘‘فارم کی شرط ختم کی جائے ۔داخلہ فیس جمع نہ کروا سکنے کے باعث ہزاروں ہونہار طالبعلم تعلیم ادھوری چھوڑنے اور علم کی روشنی سے محروم ہونے پر مجبور۔ ان خیالات کا اظہار چیئرمین قیصر ایجوکیشن ڈویلپمنٹ آرگنائزیشن(QEDO)ڈاکٹر محمد علی قیصرؔ نے میڈیا سے خطاب کرتے ہوئے کیا۔انہوں نے کہا کہ لاہور بورڈ کے سالانہ امتحان 2015کی داخلہ فیسوں میں بے جا اضافہ کر دیا گیا ہے۔ 5سال پہلے کی فیسوں سے موازنہ کیا جائے تو رجسٹریشن فیس 400روپے سے بڑھا کر 800روپے کر دی گئی، داخلہ فیس 660روپے سے بڑھا کر 1,300روپے کر دی گئی۔ جبکہ نیا اضافہ پراسیسنگ فیس کے نام سے 395روپے اور سرٹیفیکیٹ فیس کے نام سے 550روپے کر دیا گیا۔ مہنگائی کے طوفان نے پہلے ہی غریبوں کی کمر توڑی دی ہے، داخلہ فیسوں میں اس قدر اضافہ ہزاروں طلباء و طالبات کو امتحان دینے سے محروم کر دے گا۔ ایک مزدور جس کی ماہانہ تنخواہ بمشکل 7,000یا 8,000 روپے ہے ، وہ اپنے بچے کا 3,050 روپے داخلہ کیسے اداکرے گا؟ اور اگر اس کے دو یا تین بچوں نے بورڈ کے امتحان میں شمولیت اختیار کرنی ہو تو اس کے لئے داخلہ بھیجنا ناممکن ہو گا۔ اور بچوں کی سال بھر کی محنت ضائع ہو جائے گی۔ بورڈ کے اعلیٰ حکام سے گزارش ہے کہ داخلہ فیس کے شیڈول پر نظر ثانی کر کے فیس کی شرح کم کی جائے۔
