فاروق آباد کے نواحی گاؤں بھنڈور میں نکاسی آب کا انتظام نہ ہونے کے باعث بازاروں میں پانی کھڑا رہتا ہے جس کے باعث بازاروں سے گزرنا محال ہے۔ ان خیالات کا اظہار چیئرمین عشر و زکوۃ کمیٹی، بھنڈور ڈاکٹر محمد علی قیصرؔ نے میڈیا سے بات کرتے ہوئے کیا۔ انہوں نے کہا کہ سیاسی لیڈر الیکشن کے دنوں یقین دلاتے ہیں لیکن ووٹ لینے کے بعد بھول جاتے ہیں۔ کئی بار گاؤں کے مکین ایم پی اے اور ایم این کے پاس فریاد لے کر گئے لیکن جھوٹی تسلیوں کے علاوہ کچھ نہ ملا۔ وعدہ تو کیا جاتا ہے کہ پختہ نالیاں اور گلیوں میں سولنگ لگایا جائے گا، نکاسی آب کے لئے پختہ نالا تعمیر کیا جائے گا لیکن پورا نہیں کیا جاتا۔گاؤں سے گزرنے والی سڑک، جاتری روڈپر جگہ جگہ اور واحد رکشہ سٹینڈ والے چوک میں بھی اکثر پانی کھڑا رہتاہے۔ انہو ں نے مزید کہا کہ گلیوں میں جگہ جگہ کھڑا پانی مچھر کی افزائش کا موجب بن رہا ہے جس سے ملیریا اور ڈینگی جیسے مہلک امراض کے پھیلنے کا خدشہ ہے۔ میری اہلِ علاقہ کی طرف سے وزیرِ اعظم میاں محمد نواز شریف، وزیرِ اعلیٰ میاں محمد شہباز شریف اور متعلقہ اعلیٰ حکام سے گزارش ہے کہ جلد ازجلد گاؤں کی نگاسی آب کے لئے نالے کی تعمیر کروائی جائے۔
