فاروق آباد ( ایف یو نیوز)کمانڈنٹ پی سی نے ایریگیشن ڈیپارٹمنٹ کے1200سے زائد ملازمین کیلئے آفس گیٹ بند کرکے پولیس گردی کی ایک اور مثال قائم کردی۔ 1992میں محکمہ پولیس نے ایریگیشن ڈیپارٹمنٹ سے13ایکڑ آرضی لی بعد ازاں محکمہ پولیس نے مبینہ ملی بھگت سے 16ایکڑ پر قبضہ کرنے کی کوشش کی جس پر دونوں محکموں میں سرد جنگ کا آغازہوا ،فاروق آباد میں کینال کالونی کا قیام اس وقت پیش آیا جب 1965میں کیوبی لنک اور اپر گوگیرہ نہروں کو نکالنے کا کام شروع ہوا۔ پولیس کو ریزروپولیس کیلئے سنٹر بنانے کیلئے رضاکارانہ طور پر جگہ فراہم کی گئی اوراب حالات یہ ہوچکے ہیں کہ محکمہ نہر کی ذاتی زمین اور دفاتر کینال کالونی پولیس اسٹیٹ بن چکی ہے اور کینال کالونی میں پولیس اور محکمہ نہر کے اعلیٰ حکام کے آفس قائم ہیں چونکہ پولیس فورس کے پاس طاقت ہے اور اسی طاقت کے غرور کی وجہ سے کمانڈنٹ پی سی آئے روز محکمہ نہر کے ملازمین کیلئے ان اور آؤٹ گیٹ سیکورٹی کے نام پر بند کر دیتے ہیں جس کی وجہ سے کینال کالونی کے اندر موجود رہائش گاہوں میں بسنے والی فیملیز،سکول میں آنے اور جانے والے طلبا ء طالبات ،مریضوں ،ضعیف العمر خواتین اور 1200سے زائد ملازمین کو شدید پریشانی کا سامنا کرنا پڑتا ہے اور محکمہ نہر کے ہزاروں ملازمین اپنے دفاتر میں محکمہ پولیس کے ہاتھوں ذلیل وخوار ہو رہے ہیں۔ پولیس گردی کی انتہا اس وقت دیکھنے میں آئی جب 18گریڈ کے اعلیٰ ترین آفیسر ایکسیئن جام داد خان کو ان کے آفس میں داخل ہونے سے پولیس نے روک دیا اور ان کو مایوس واپس لوٹنا پڑا ۔ایریگیشن ڈیپارٹمنٹ نے پولیس گردی کے اس واقعہ کی پر زور مذمت کرتے ہوئے چیف سیکرٹری پنجاب کو تحریری طورپر آگاہ کردیا ہے دوسری طرف محکمہ نہر کے ہزاروں ملازمین نے سخت ردعمل دینے کا اعلان کردیا ہے ۔
