پاکپتن (بیوروچیف) محنت کش نوجوان کو جہاز بنا کر اڑانا مہنگا پڑگیا، فیاض منی جہاز بنا کر اڑانے کیلئے جوں ہی سڑک پر آیا، پولیس نے اٹھایا اور حوالات میں ڈال دیا۔ اے ایس آئی کی مدعیت میں مقدمہ بھی درج کرلیا گیا ایڈیشنل سیشن جج عارفوالا نے تین ہزار روپے جرمانہ کر کے رہائی کا حکم دے دیا۔ تفصیلات کے مطابق جہاز بنانے والے پاکپتن کے گاؤں 32ایس پی تابر کا رہائشی فیاض کے خلاف درج کیئے گئے مقدمہ میں پولیس کی جانب سے موقف اختیار کیا گیا ہے کہ نوجوان فیاض نے بغیر کسی پرمٹ یا حکومتی اجازت نامہ کے ایک منی جہاز بنایا اور 50 ایس پی گاؤں کے قریب اڑاتا رہا پولیس کا ایف آئی میں یہ بھی کہنا تھا کہ ملزم نے پرواز کے دوران جہاز کے خطر ناک کرتب بھی دکھائے، اور اس دوران کوئی حادثہ بھی پیش آسکتا تھا جس کی وجہ سے اسے گرفتار کیا گیا،مقدمہ تھانہ رنگ شاہ کے ایک اے ایس آئی کی مدعیت میں درج کیا گیا اور ریمانڈ کے لئے ایڈیشنل سیشن جج عارفوالا کی عدالت میں پیش کیا گیا جس پر عدالت نے سماعت کے بعد ملزم کو تین ہزار روپے جرمانہ کر کے رہائی کا حکم دے دیا۔
