پاکپتن (بیورورپورٹ) آجر اور آجیر کے درمیان مستحکم تعلقات روشن پاکستان کی نوید ہیں قوانین کے مطابق بانڈڈ لیبر کے خاتمے کیلئے موثر اقدامات کیے جائیں لیبر ڈیپارٹمنٹ کے افسران اینٹوں کے بھٹوں کی باقاعدگی سے چیکنگ کریں اور سکول کے اوقات کار کے دوران اینٹوں کے بھٹوں پر ہر صورت چائلڈ لیبر کے خاتمے کو یقینی بنائیں، ان خیالات کا اظہار ایڈیشنل ڈپٹی کمشنر جنرل قیوم قدرت نے ضلعی ویجلنس کمیٹی کے بلائے گئے اجلاس کی صدارت کرتے ہوئے کیا ،اجلاس میں ڈپٹی دائریکٹر سوشل ویلفےئر افضل بشیر مرزا ، اسسٹنٹ ڈائریکٹر پبلک پر اسکیوٹر رحمت علی شہزاد ، سپر ٹینڈنٹ سوشل سیکورٹی محمد طفیل ، بانڈدلیبر لیبریشن فرنٹ یونین کی صدر میڈم ممتاز ، ڈی او ایلمنٹری رائے نذر محمد ، ڈی او انفارمیشن سید سلمان حسین ، ڈی ایس پی غلام محمد ، اسسٹنٹ ڈائریکٹر لیبر کلیم یوسف سمیت دیگر متعلقہ اداروں کے افسران بھی موجود تھے ، اسسٹنٹ ڈائریکٹر لیبر کلیم یوسف نے بانڈڈ وچائلڈ لیبر کے خاتمے کیلئے کیے جانے والے اقدامات سے متعلق تفصیلی طور پر بتایا ، سپر ٹینڈنٹ سوشل سیکورٹی محمد طفیل نے کہا کہ سوشل سیکورٹی کارڈ کے حصول کیلئے 16 اینٹوں کے بھٹوں کو رجسٹرڈ کیا گیا ہے ، جن میں 35بھٹہ خشت مزدوروں کو سوشل سیکورٹی کارڈ جاری کر دیے گئے ہیں ، ایڈیشنل ڈپٹی کمشنر جنرل قیوم قدرت نے سوشل سیکورٹی کارڈ کی فراہمی کیلئے متعلقہ افسران کو ہدایات جاری کیں ، انہوں نے کہا کہ مزدورں کی اجرت ان کا پسینہ خشک ہونے سے پہلے ادا کی جائے ۔
