ڈی سی او شیخوپورہ علی جان خان نے ضلع بھر میں حالیہ بارشوں کی شدید لہر کے باعث ضلع بھر کے تمام سرکاری سکولوں کو بند کرنے کے احکامات جاری کر دئیے ہیں ۔اس بات کا فیصلہ ڈی سی او شیخوپورہ علی جان خان نے محکمہ تعلیم ،ریونیو ،ٹی ایم اے کے افسران کی اس ضمن میں ایک اجلاس میں کیا ۔انہوں نے ہدایت کی کہ ضلع بھر کی تمام تحصیلوں میں متعلقہ ٹی ایم ایز کا عملہ ہنگامی بنیادوں پر کام کرے تا کہ اس قدرتی آفت سے قیمتی انسانی جانوں اور املاک کی حفاظت کی جاسکے۔انہوں نے کہا ڈی واٹرنگ پمپس اور بارش کے پانی کو نکالنے کیلئے جنریٹرز کا استعمال کیا جائے اور تمام عملہ 24گھنٹے اپنے فرائض انجام دے۔انہوں نے ہدایت کی کہ سرکاری ،نیم سرکاری اور پرائیویٹ عمارتوں کی مسلسل نگرانی کی جائے اور جہاں جہاں خستہ حال عمارتیں ہیں انہیں خالی کروایاجائے۔ ڈی سی او علی جان خان نے عوام سے اپیل کی کہ وہ اپنے گھروں میں خستہ حال اور مخدوش کمروں سے اپنے آپ کو دور کریں ،شارٹ سرکٹنگ کی صورت میں لیسکو کو اطلاع کریں ۔
