کراچی: سیاسی وسماجی رہنما وبانی عام آدمی پاکستان ایاز میمن موتی والانے لاڑکانہ میں تین پشتون مزدوروں کی ٹارگٹ کلنگ پر گہری تشویش کااظہار کرتے ہوئے کہاہے کہ لاڑکانہ میں محنت کشوں کے بے دردی سے قتل کا واقعہ حکمرانوں کے لیے لمحہ فکریہ بن چکاہے سندھ میں یکے بعد دیگر ایسے واقعات کا رونما ہونا اس بات کی طرف اشارہ ہے کہ سندھ کے امن کو خراب کرنے کی کوششیں کی جارہی ہیں ،جو لوگ سندھ بھر میں لسانی جھگڑوں کو خواہش مند ہیں ان کی یہ خواہش صوبے میں بسنے والی تمام قومیں آپس میں بھائی چارے کے فروغ سے ہی ختم کرسکتی ہیں جبکہ حکمرانوں پر اب واجب ہے کہ وہ مقتولین کے ورثاء کو بروقت انصاف دلانے کے لیے نہ صرف ان کی مالی مددکریں بلکہ قاتلوں کو بھی فوری گرفتار کرنا چاہیے ۔ان خیالات کااظہار انہوں نے ڈیفنس میں عام آدمی پاکستان کے دفتر سے جاری کردہ بیان میں کیا،ان کا کہنا تھاکہ ہمارا ملک ایک بار پھر سے قتل وغارت گری کے واقعات کا متحمل نہیں ہوسکتاصوبے میں امن وامان کے لیے پولیس اور رینجرز کا کردار قابل ستائش رہاہے اور جن کی قربانیوں کا سلسلہ ابھی تک جاری ہے اور جولوگ صوبہ سندھ میں بدامنی پھیلارہے ہیں درآصل ان کے مقاصد میں سیکورٹی فورسزکی قربانیوں پر سوالیہ نشان لگانا بھی ہے ،انہوں نے کہاکہ سندھ کی عوام ایسے واقعات کو روکنے کے لیے سیکورٹی اداروں کا بھرپور ساتھ دے اور اپنے اردگرد کے مشکوک لوگوں پر نظررکھیں تاکہ کسی بھی قسم کی شرپسندی سے فوری طورپر نمٹا جاسکے ،جبکہ ہم سمجھتے ہیں کہ کسی کو بھی قانون کو اپنے ہاتھ میں لینے کی کوشش نہیں کرنی چاہیے ۔انہوں نے کہاکہ گزشتہ دنوں سے کراچی اور سندھ میں ہونے والے واقعات نے عوام کو ایک بارپھر سے خوفزدہ کردیاہے لہذاسندھ حکومت کو اب بیان بازیوں سے نکل کر فوری اقدامات اٹھانے کی طرف آنا چاہیے تاکہ مزید ایسے واقعات سے بچاجاسکے۔ انہوں نے مزید کہاکہ نئی حکومت کی جانب پوری قوم کی نظریں ہیں مگر مہنگائی اور بے روزگاری کا جو طوفان سر اٹھاچکاہے اس سے بھی انکار نہیں کیا جاسکتا ۔

QR Code: