پاکستان میڈیا فورم کے مرکزی صدر جی ایم جٹ اور جنرل سیکرٹری محمد اطہر خرم ممبر سازی کی مہم کے سلسلہ میں آج فاروق آباد تشریف لائے۔ صدر نیشنل پریس کلب محمد عمران ہاشمی، جنرل سیکرٹری سید تقی رضا بخاری، چیف ایڈیٹر فاروق آباد اَپ ڈیٹس ڈاکٹر محمد علی قیصرؔ و دیگر صحافیوں نے نیشنل پریس کلب فاروق آباد کے جنرل سیکرٹری کی رہائش گاہ پر ان کا والہانہ استقبال کیا۔ ان کے گلے میں مالا پہنائی اور ان پر پھولوں کی پتیاں نچھاور کیں۔ پاکستان میڈیا فورم کے مرکزی صدر جی ایم جٹ نے صحافیوں سے بات چیت کرتے ہوئے کہا کہ پاکستان میڈیا فورم کی ممبرسازی کی مہم کے سلسلہ میں آج ہم مریدکے، شیخو پورہ، فاروق آباد، سانگلہ ہل، شاہکوٹ، جڑانوالہ، چنیوٹ اور فیصل آباد کےتنظیمی دورے پہ ہیں۔ پاکستان میڈیا فورم پاکستان کے میڈیا کی ایک ایسی تنظیم ہے جس کا منشور مختصر مگر بامقصد اور با معنی ہے۔ جس میں سب سے پہلا لفظ یونیٹی کا ہے، دوسرا پروموشن کا اور تیسرا لفظ آرگنائزیشن کا ہے۔ اتحاد ہمارے منشور کا سب سے اہم حصہ ہے آج ہر جگہ ہمارے صحافی ذاتی رنجش، سیاسی مفادات، سیاسی لوگوں کے اختلافات اور بیورو کریسی کے معاملات کی وجہ سے تقسیم در تقسیم ہوتے جا رہے ہیں۔ جس کی وجہ سے ہماری کمیونٹی کا چہرہ مسخ ہوتا جا رہا ہے اور ہماری عزت اور وقار دائو پر لگ چکے ہیں۔ پاکستان میڈیا فورم میڈیا کمیونٹی کی عزت اور وقار کی بحالی کے لئے میدان عمل میں آ چکا ہے۔ پاکستان میڈیا فورم ایک ایسی آرگنائزیشن ہے جس میں میڈیا سے منسلک ہر شخص بلا تفریق ممبر بن سکتا ہے خواہ وہ الیکٹرونک میڈیا سے ہو یا پرنٹنڈ میڈیا سے۔ پاکستان میڈیا فورم ہر صحافی کی نمائندہ آرگنائزیشن ہے۔ ہم نے سب کو متحد کرنا ہے اور ان کی عزت اور وقار کی بحالی کے لئے جدوجہد کرنی ہے۔ ممبر سازی کے حوالے سے ایک صحافی کے سوال کے جواب میں انہوں نے کہا کہ ہر تحصیل اور ضلع کی سطح پر کوارڈینیٹر اور ڈپٹی کوارڈینیٹر کو نامینیٹ کیا جائے گا اور وہ ممبر سازی کریں گے اس کے بعد الیکشن ہو گا اور ہارنے والا جیتنے والے کو ہار پہنائے گا۔ اختلاف رائے جمہوری طریقے سے ہو گی۔ اصل ایجنڈا جو صحافیوں کے مسائل کو حل کرنا ، بہت سے مسئلے مسائل ہیں جو اختلافی معاملات کی وجہ سے حل نہيں ہو رہے جن کی وجہ سے صحافیوں کو ان کے بنیادی حقوق نہيں مل رہے اس حوالے سے پاکستان میڈیا فورم نے ایک منشور دیا ہے جس کے لئے سب نے مل کر کام کرنا ہے، پاکستان کے وہ ہزاروں نوجوان صحافی جن کے پاس ٹیلنٹ ہے ان کو ایک گل دستے کی طرح اکھٹا کرنا ہے اور اپنے مقصد کو پایا تکمیل تک پہنچانا ہے۔

QR Code: