داؤدخیل (سٹاف رپورٹر) انتقامی کارروائیاں کر کے ماڑی شہر کے لوگوں پر بے گناہ منشیات کے مقدمے درج کیے جا رہے ہیں اور ڈی پی او میانوالی کی طرف سے قائم ہونے والی انکوائری میں صفائی دینے والوں کو بھی اب دریائی چیک پوسٹ ککڑنوالہ کے پولیس اہلکار فاروق،شاہد ،ظفر اقبال ہراساں کر رہے ہیں اور دھمکیاں دے رہے کہ تمھارے خلاف بھی 9-سی کے مقدمے درج کر دیں گے۔ ان خیالات کا اظہار ماڑی شہر کے معززین نمبر دار سید واجد حسین شاہ ،سابق کونسلر الطاف حسین ،سماجی کارکنان اعجاز خان جازی ،ملک تنویر حسین ،حاجی عزیز اللہ نے پریس کانفرنس کرتے ہوئے کیا۔ انہوں نے کہا کہ دریائی چیک پوسٹ پولیس کے اہلکاروں اے ایس آئی اقبال ،فاروق ،شاہد ،ظفر اقبال کانسٹیبل نے انتقامی کاررائیوں کا سلسلہ جاری کیا ہوا ہے۔ 26رمضان کو عرفان عبا س کو ریلوے پھاٹک پر سادہ کپڑوں میں ملبوس فاروق اور شاہد نے روکا اور اسے وہاں سے تقریبا تین کلو میٹر دور دریائی چیک پوسٹ پر لے آئے اور اس سے 18000روپے اور موبائل بھی لے لیا اور ا سکے خلاف 9-سی کا من گھڑت مقدمہ درج کر دیا۔ ہم لوگوں نے ڈی پی او میانوالی سے ملاقات کی اور انہیں کہا کہ اگر ماڑی شہر کا ایک فرد بھی کہہ دے کہ عرفان عبا س منشیات فروش ہے تو ہمیں مقدمہ قبول ہے اور انکوائری میں صفائی دینے والے مختیار ماچھی ،جاوید اقبال دوکاندار ،نیاز حجام کو پولیس اہلکار دھمکیاں دے رہے ہیں کہ اگر دوبارہ تم لوگوں نے گواہی دی تو تمھارے خلاف بھی ایسا ہی مقدمہ درج کر دیں گے ۔ ماڑی شہر کی ایک آرگنائزیشن کی طرف سے اپنی مدد آپ کے تحت واٹر سپلائی لگائی جس سے ماڑی شہر کے سینکڑوں گھروں کو پینے کا پانی مہیاکیا جا رہا تھا، ان ظالم پولیس اہلکاروں نے کنکشن کرنے کی کوشش کی تو ہم لوگوں نے ان کو منع کیا کہ ا س کنکشن سے شہریوں کو پانی کی ترسیل میں مشکلات ہو گی جس پر اے ایس آئی اقبال اور پولیس اہلکار مسلح ہو کر آ گئے اور زبردستی دو انچ کا کنکشن لگا دیا جس سے اب ماڑی شہر کے سینکڑوں گھروں کا پانی کم ہو گیا ہے، اس وقت سینکڑوں گھر پانی کی بوند بوند کو ترس رہے ہیں۔ انہوں نے کہا کہ ڈی پی او میانوالی سرفراز ورک خود ماڑی شہر میں کھلی کچہری لگائیں انہیں دودھ کا دودھ اور پانی کا پانی ہو جائے گا۔ انہوں نے ڈی پی او میانوالی سے مطالبہ کیا ہے کہ فوری طور پر ان کرپٹ پولیس اہلکاروں کو تبدیل کر کے ان کے خلاف قانونی کارروائی کی جائے کیونکہ جب قانون کے رکھوالے ہی قانون شکن ہو جائیں تو غریب لوگ کس سے انصاف کی امید رکھیں۔ آخر پر ماڑی شہر کے لوگوں نے پولیس اہلکاروں کے خلاف پلے کارڈزاُٹھاکراحتجاج کیا ۔ دریائی چیک پوسٹ کے انچارج اقبال سے رابطہ کیا تو انہوں نے بتایا کہ ہم نے دوران چیکنگ عرفان عبا س سے منشیات برآمد کی اور اس کے خلاف مقدمہ درج کیا اور جو بھی جرائم کرئے گا ہم اپنی کارروائی کریں گے اور ہمیں اعلیٰ افسران کی جانب سے حکم ہے کہ جرائم پیشہ افراد کے خلاف سخت سے سخت کارروائی کی جائے تاکہ ضلع سے جرائم کا خاتمہ ہو ۔انہوں نے کہاکہ پریس کانفرنس میں لگائے گئے الزامات بے بنیاد ہیں۔
