قومی زبان شعور کی زبان۔۔۔۔ تحریر: ذوالفقار خان، داؤد خیل

اُردو کی اہمیت سے انکار، سورج کی روشنی کے انکار کے مترادف ہے۔ اُردو ہماری قومی زبان ہے۔ ا س میں کوئی شک نہیں کہ واقعی اُردو قوم کی زبان ہے۔ آپ خیبر سے کراچی ، کوئٹہ سے لاہور اور اسلام آباد سے گلگت بلتستان اور مظفر آباد تک ہو آئیں ، علاقائی زبانوں کے بیچ ہرجگہ مشترک زبان جو ملے گی وہ اُردو ہی ملے گی۔ بڑے سے لے کر بچے تک اُردو سمجھتے بھی ہیں اور اپنے اپنے لہجوں کے ساتھ بولتے بھی سنائی دیتے ہیں۔
اُردو پاک وطن کی مختلف اکائیوں کو آپس میں جوڑنے کا سبب بھی ہے۔اُردو باادب بنانے کا ایک بہترین ذریعہ بھی ہے۔ علاقائی زبانوں میں بچے سے لے کر بڑے تک جو غیر شائستہ الفاظ روانی سے بولتے سنائی دیتے ہیں ، وہی اُردو زبان بولتے ہوئے غیرشائستگی اور بدزبانی کے الفاظ بولنے سے رُک جاتے ہیں۔ وہ غصے کے اظہار تک سے معذور دکھائی دیتے ہیں۔ چھوٹے چھوٹے بچوں کو اپنی مادری زبان کے ساتھ ساتھ جب اُردو بھی بولنا سکھائی جاتی ہے تو اُس کے بات کرنے کا انداز بہت سحرانگیز ہوتاہے۔ ہماری دوسری علاقائی زبانوں کا اُردو کے ساتھ رشتہ بھی بہت قربت کا محسوس ہوتاہے۔ پنجابی ، سرائیکی، ہندکو زبانیں تو اُردو کے بہت ہی قریب قریب ہیں۔پشتون بھائی جس طرح پاکستان کے چپے چپے میں محنت مزدوری اور کاروبار کے لیے موجود ہیں اُن کے لیے اُردو ہی سب سے موثر ذریعہ ابلاغ و کاروبار ہے۔ صوبہ کے پی کے میں اُردو اس وجہ سے بہت زیادہ سمجھی جاتی ہے۔اِسی طرح پاکستان کے تمام بڑے شہروں میں تو اُردو کا راج ہے۔
اُردو کی اہمیت اور پاکستان کے لیے اس کی ناگزیریت کا اندازہ اس سے بھی لگایاجاسکتاہے کہ یہاں اُردو چینلز اور اخبارات کی بھرمارہے۔ بھرمار کی وجہ صرف اور صرف یہ ہے کہ پاکستان کے ہر علاقے میں اُردو سمجھنے والے، پڑھنے والے اور بولنے والے کثرت سے پائے جاتے ہیں اور اِن کی پہلی ترجیح اُردو ہے۔اُردو نیوز چینلز کے ساتھ دو انگلش چینلز آن ایئر ہوئے مگر ان کو ناظرین کی بہت قلیل تعداد میسر آسکی۔ ان کی ریٹنگ نہ ہونے کے برابر تھی۔ جس پر مجبوراََ ایک نیوز چینل کو بند ہونا پڑا جبکہ دوسرا انگلش سے اُردو میں تبدیل ہوگیا۔ اِسی طرح اخبارات کا حال ہے۔ اُردو اخبارات کے بیچ انگلش اخبارات آٹے میں نمک کی اوسط سے بھی کم دکھائی دیتے ہیں۔اُردو اخبارات کی تو اتنی پذیرائی ہے کہ ہمارے علاقائی زبانوں کے اخبارات بس زینت کی حد تک شائع ہوتے ہیں اور خود اُس علاقے کے عوام کے لیے ان کو پڑھنے میں بہت کم دلچسپی دکھائی دیتی ہے۔
جہاں اُردو کی اتنی ضرورت پڑے کہ ہمیں انگلش کے خط کو سمجھنے کے لیے اُس کا اُردو ترجمہ کراناپڑے، جہاں نصاب کی کتب چاہے وہ انگلش کی ہو یا سائنس وغیرہ کی۔ سب کو سمجھنے کے لیے کسی نہ کسی حوالہ سے اُردو کا سہارا لینا پڑے تو وہاں اُردو کی اہمیت سے انکار کس طرح کیا جاسکتاہے ؟
رہی انگلش کی اہمیت تو اس سے انکار ممکن نہیں۔ مگر اُس کا یہ حل نہیں کہ پوری قوم کو انگلش کے بخار میں مبتلا کرکے ایک ہیجان انگیز کیفیت پیداکردی جائے۔ انگلش سمجھنے والے جہاں بہت کم لوگ ہیں وہاں انگلش بولنے والے تو اور بھی بہت قلیل ہیں۔ہمارے سول بیوروکریٹس اور فوجی آفیسرز کے علاوہ انگلش بولنے کا رجحان کہیں دکھائی نہیں دیتا۔ ہمارا انگلش کا پروفیسر بھی اُردو میں شاعری کرتا اور بہتر نثر لکھتا دکھائی دیتاہے۔
سکولز کے اندر یہ حالت ہے کہ انگلش کی ڈھنگ سے سمجھ اُستاد کو ہے نہ طالب علم کو۔ رٹہ سے کام چلایاجارہاہے۔ نئی نسل کی تخلیقی صلاحیتیں اس وجہ سے زنگ آلود ہورہی ہیں۔ ریاضی کے ٹیبل یا پہاڑے جو ہم اپنی علاقائی زبان میں بہت جلد اور بہت دیرپا طریقے سے سیکھ اور سکھاسکتے ہیں اب بچوں کو زبردستی انگلش میں یاد کرانے کی کوشش کی جاتی ہے جو جوئے شیر لانے سے بھی آگے کی کوئی منزل بن چکی ہے۔بچے منہ ٹیڑھا کرکرکے تھک جاتے ہیں مگر اُن کو ٹو ٹو آر فور اور سیون سکس آر فارٹی ٹو تک یاد رکھنا مشکل ہوجاتاہے۔ دودُونے چار اور ست چھ بتالی بھی اگر بچہ یاد کرلے جو کہ وہ یاد بھی آسانی سے کرلیتاہے تو پیپر پر لکھتے ہوئے دونوں بچے ایک ہی ہندسہ لکھیں گے۔
بے شک انگلش کو ہر کلاس میں لازمی مضمون کے طور پر ضرور رکھیں مگر ہر مضمون کو انگلش میں تبدیل کرنے کی قطعاََ ضرورت نہیں۔ یا پھر باقی مضامین میں کھلا آپشن دے دیاجائے کہ جو مرضی ہے اُردو میں پڑھے جو مرضی ہے انگلش میں۔
اگر سائنس یا کمپیوٹر کی اصطلاحات کا مسئلہ درپیش ہے تو وہ پہلے ہی روبہ عمل ہوچکاہے کہ اصطلاحات جس زبان کی ہیں اُن کو اُسی میں پڑھایاجائے مگر باقی بیان کو اُردو میں لکھا اور سمجھایاجائے تو وہ سب سے موثر ثابت ہوتاہے۔
موٹرگاڑیوں، فیکٹریز وغیرہ کے بڑے بڑے کامیاب مکینکس اپنے اساتذہ سے اپنی مقامی زبانوں سے سمجھ سمجھ کر اور دیکھ دیکھ کر سیکھے ہیں۔ ڈاکٹرز کے ساتھ کام کرنے والے اسسٹنٹس نے کبھی میڈیکل کی انگلش کی کتاب کھولی ہی نہیں ہوتی مگر وہ اپنے ڈاکٹر سے دیسی زبان میں سُن کر اور سمجھ کر تمام لوازمات کو سنبھال لیتے ہیں۔
اگر میٹرک میں سائنس مضامین اُردو میں پڑھائے جا سکتے ہیں تو ایف ایس سی میں کیا چیز رکاوٹ ہے۔ ایف ایس سی میں انگلش ذریعہ تعلیم ہونے کی وجہ سے کئی لائق لائق بچے اچھے نمبر لینے سے محروم رہ جاتے ہیں۔ اب ہر بچے کو تو سول و فوجی بیوروکریسی کے بچوں جیسا ماحول میسر نہیں ہے اور نہ ہی ایسا ماحول مہیاکرنا ممکن ہے۔ جن بچوں کے والدین گھر میں ہر وقت اپنی مادری زبان بولتے ہیں وہ انگلش زبان کے لیے ماحول کو کیسے تبدیل کرسکتے ہیں۔
اگر اُردو ہماری دفتری زبان بن جائے تو عوام کو آئین و قانون سے بہت بہتر آگاہی ہوگی۔ جو استحصال عام آدمی کا خط و کتابت اور دفتروں کے انگلش میں لکھے گئے قوانین و ضوابط کی وجہ سے ہورہاہے یہ رُک جائے گا۔ ہمارے اداروں کے ذمہ داران بھی پھر محتاط رہیں گے۔ اور عام آدمی کو اپنے حقوق اور فرائض کا بھی بہتر پتا ہوگا۔
البتہ جو شوقیہ انگلش کو ذریعہ تعلیم بنا نا چاہتاہے تو اُس پر پابندی نہ ہو مگر انگلش کی وجہ سے اُسے کسی نوکری اور دیگر معاملات میں ترجیح نہ دی جائے۔کوئی طالب علم ایف ایس سی انگلش میں کرے یا اُردو میں دونوں برابر تصور ہوں۔ نمبر لگاتے ہوئے بچے کی قابلیت کی جانچ کی جائے نہ کہ ذریعہ تعلیم کو مدنظر رکھاجائے۔
پبلک سروس کے امتحان میں بھی باقی سب سوالات اُردو میں دیئے جائیں سوائے انگلش کے مضمون کے۔
اُردو ہماری قومی زبان ہے۔ خدا را اس کے ساتھ ہر قومی چیز والا حال نہ کریں۔ جس طرح قومی کھیل ہاکی کا ستیاناس کرکے رکھ دیاہے۔قومی پھول چنبیلی کہیں نہ کہیں باغوں میں یا پھراکا دُکا اداکارہ کے نام تک محدود ہوگیاہے، کوئی ڈھنگ کا عطر یا پرفیوم ہم نے بین الاقوامی سطح پر متعارف نہیں کرایا جو ہمارے قومی پھول کے ساتھ ساتھ پاکستان کی پہنچان بھی بنتا۔ اسی طرح قومی جانور مارخور کو بھی مار مارکے اور خور خور کے ناپیدی کے کنارے لے آئے ہیں۔قومی دنوں کے ساتھ بھی ہمارا سلوک کوئی قابلِ رشک نہیں۔
بحیثیتِ مجموعی چاہے قوم ہو یا ہماری قومی چیزیں کسی جنس کی طرف بھی ہمارے اربابِ اختیار اور دیگر ذمہ داران کی کوئی توجہ ہے اور نہ ہی قوم کو اپنی بربادی کا شعور ہے۔ اب تو اُردو کے دفتری زبان کے رائج کرنے کے لیے اعلیٰ عدلیہ نے بھی حکم جاری کردیاہے تو قوم کو اب آگے بڑھنا چاہیے۔ تحریکِ اُردو پاکستان و دیگر کے نام سے پلیٹ فارمز موجود ہیں۔ قوم کو متحد ہوکر اُردو کے رائج کرانے کے لیے ہر فورم پر آواز بلند کرنی چاہیے۔ اپنے اپنے علاقہ کے سیاسی نمائندگان کو بھی مجبور کیاجائے کہ وہ اسمبلی میں قومی زبان کے رائج کرانے میں اپنا بھرپور کردار ادا کریں۔ دفتری زبان اُردو ہونے سے ہمارے عوامی نمائندے بھی بیوروکریسی کی انگلش والی بلیک میلنگ سے نجات حاصل کرلیں گے۔ بیوروکریسی کی انگلش کی وجہ سے پیداکردہ پیچیدگیوں سے بھی نجات ملے گی۔ جب قوم کی زبان اور اربابِ حل و عقد کی زبان ایک ہوگی، جب سب یک زبان ہونگے تو مسائل کا حل بھی نکلے گا اور بڑے بڑے عقدے بھی کھُلتے جائیں گے۔