پنجاب حکومت نے نئے بلدیاتی انتخابات کے لئے حلقہ بندیوں کی ابتدائی تیاریاں شروع کر دی ہیں۔ ضلعی حکومتوں سے ہنگامی بنیادوں پر ہر ضلع کا نقشہ مانگ لیا ہے۔ جس میں میونسپل کارپوریشن، میونسپل کمیٹیاں اور تحصیلوں کے علاوہ قانونگو اور پٹوار سرکلوں کی واضح حد بندی کی گئی ہو۔ میونسپل کارپوریشنوں کے علیحدہ نقشے بھی طلب کر لئے ہیں جن میں مردم شمار یونٹوں کی نشاندہی واضح طور پر کی گئی ہو اور شہر کی سڑکیں بھی واضح طور پر درج کی گئی ہوں۔ ذرائع کے مطابق حکومت نے مونسپل کمیٹیوں کے بھی نقشے فوری طور پر بھیجنے کی ہدایت کر دی ہے جس میں سینسس یونٹوں کے علاوہ سڑکوں کے انفرا سٹرکچر کی واضح نشاندہی کی گئی ہو۔ ذرائع کے مطابق یہ نقشے 6نومبر سے قبل بھیجنے کی ہدایت کی گئی ہے۔
