داؤدخیل(ذوالفقارخان) یوسی پکی شاہمردان ، داؤدخیل اور ماڑی انڈس کے عوام کا استحصال کسی صورت برداشت نہیں کریں گے۔ فیکٹریز کے زیرِ انتظام چلنے والے سکولز اور ہسپتال میں گردونواح کی آبادیوں کا حق ہے۔ بچوں کو مفت تعلیم دی جائے اور مفت صحت کی سہولتیں دی جائیں۔ انٹرا پارٹی الیکشن میں دھاندلی کا نام و نشان بھی نہیں ملے گا۔پارٹی کو وڈیروں اور مفاد پرستوں کے تسلط سے آزاد کرائیں گے۔ یہ باتیں پی پی چوالیس سے پی ٹی آئی کے مرکزی راہنما حاجی شیکا خان نے گزشتہ روز سکندرآباد پکی شاہمردان میں پارٹی ورکرز کے ہمراہ پریس کانفرنس کے دوران کہیں۔ حاجی شیکا خان نے کہاکہ یہاں کی فیکٹریز کے زیرانتظام چلنے والے سکولز میں گردونواح کے بچوں کو داخلہ نہ دینابنیادی حق پر ڈاکہ ڈالنے کے مترادف ہے۔ ای ڈی او ایجوکیشن کو فی الفور اس کا ایکشن لینا چاہیے ۔پارٹی ورکرز کی شکایت پر حاجی شیکا خان نے اعلان کیاکہ اگر اپریل کے پہلے ہفتہ تک ہمارے بچوں کو داخلہ نہ ملا تو ہم ہر ذمہ دار کے گھر کے سامنے سینکڑوں پارٹی ورکرز اور شہریوں کے ہمراہ دھرنا دیں گے۔ حاجی شیکا خان نے کہاکہ ڈیرہ ٹوکانوالہ میں دو ٹرانسفارمرز اشد ضرورت ہیں۔ ٹرانسفارمرز منظورہوچکے ہیں جنہیں فی الفور نصب کیاجائے۔اس قصبہ کی نکاسی آب کے لیے شیرشاہ سوری کچی سڑک استعمال کی جائے اور دوسری طرف محکمہ انہار کی ریلوے لائن والی خالی جگہ کو استعمال کیاجائے۔ انہوں نے کہاکہ انٹرا پارٹی الیکشن میں پی ٹی آئی کے ورکرز بھرپور حصہ لیں گے۔بلدیاتی الیکشن میں پارٹی ورکرز کو ترجیح دی جائے گی۔انہوں نے کہاکہ مسلم لیگ ن کی حکومت بُری طرح ناکام ہوچکی ہے۔ عام آدمی عدم تحفظ اور غربت کا شکار ہے۔ کاروبار ٹھپ ہوکے رہ گئے ہیں۔لوڈشیڈنگ جوں کی توں ہے۔پٹرول اور ڈیزل کی قیمتیں کم ہونے کے باوجود مہنگائی کم نہیں ہوئی۔حاجی شیکا خان نے کہاکہ کسان کو پہلے چاول کی قیمت کم کرکے مارا گیا اور اب گندم کی قیمت کے کم ہونے کا خطرہ بھی پیدا ہوگیاہے۔کسانوں سے احتجاج کرنے کا حق بھی چھین لیا گیاہے۔ مسلم لیگ ن نے ہمیشہ ڈکٹیٹر اندازِ حکمرانی اپنایا ہے۔ انہوں نے کہاکہ بلدیاتی الیکشن میں پی ٹی آئی پنجاب میں کلین سویپ کرے گی۔ اس موقع پر رفیق خان، کرامت اللہ خٹک، شوکت حیات، انوار احمد، ملک پرویز، ثمن خان، اظہر شاہ، محمد حنیف خان، ملک نعیم اعوان، شاہ مجید قریشی اور ملک مستفیق اعوان بھی موجود تھے۔