داؤدخیل(نامہ نگار) نواحی علاقہ پکی شاہمردان کے محلہ فاروق آباد کی مسجد رحمن سے تبلیغی جماعت کو نکال دیاگیا۔ دوسرا دِن یہ لوگ کھُلے آسمان تلے شامیانہ لگا کر وقت گزار رہے ہیں۔ تبلیغی جماعت کے اہلکاروں کا کہنا ہے کہ ہماری تشکیل اس علاقہ میں ہوئی ہے۔ ہم پہلے پکی شاہمردان کی بلال مسجد میں گئے تو وہاں کی انتظامیہ نے ہمیں عشاء کی نماز بھی نہ پڑھنے دی اور کہاکہ فی الفور یہاں سے نکل جائیں۔ بعد میں ہم محلہ فاروق آباد کی مسجد رحمن میں اللہ اور اُس کے رسول ﷺ کا پیغام بیان کرنے آئے۔ یہاں کے مولانا صاحب اور کچھ کمیٹی کے ممبران نے ہمیں مسجد سے نکال دیا۔ مگر ہمیں اِن پر کوئی غصہ نہیں ہے۔ ہم اپنا کام کرتے ہیں ، یہ اپنا کام کریں۔ اِن کو ہماری دعوت کا احساس نہیں ہے ، اس لیے انہوں نے ہمیں مسجد سے باہر نکال دیا ہے۔ جب یہ اللہ اور اُس کے پیارے حبیب ﷺ کے اصلی پیغام کو سمجھ جائیں گے تو یہ خود مددگار بن جائیں گے۔ تبلیغی جماعت والوں نے نمائندہ کی منت کی کہ اس بات کو نہ پھیلایاجائے۔ ہمارا کام فتنہ فساد نہیں اور نہ ہی کسی کی بدنامی کرانا ہے۔ دوسری طرف جب مسجد کے مولانا سے ملنے مسجد گئے تو اُس نے اندر سے دروازہ بند کررکھاتھا۔ بار بار کھٹکتانے کے باوجود مولانا صاحب نے دروازہ نہ کھولا۔ جب کہ اُس محلے کے کچھ لوگ تبلیغی جماعت سے اپنی نفرت کا اظہار کرنے لگے جبکہ کئی لوگ تبلیغی جماعت کے ساتھ ہونے والے ناروا سلوک پر افسوس کا اظہار کرنے لگے۔اُن کا کہنا تھاکہ تبلیغی جماعت والے کسی کو زبردستی بات نہیں سناتے۔ وہ تو مسجد میں ایک دو نمازوں کے بعد دس پندرہ منٹ کا خطاب کرتے ہیں۔ جو سنے اُس کی مرضی جو نہ سُنے اُس کی مرضی۔ مگر فتنہ پرست اور فرقہ واریت کے مارے لوگ اللہ کے گھر سے بھی اللہ کے بندوں کو اللہ اور اُس کے رسول ﷺ کی بات کرنے سے روک دیتے ہیں۔ وہ اس طرح اللہ کا غضب خرید رہے ہیں۔