داؤدخیل(سروے : ذوالفقارخان) داؤدخیل کی مقامی سیمنٹ فیکٹری کی آلودگی انسانی صحت ،فصلوں اور درختوں کومتاثرکررہی ہے۔اس کی روک تھام کی جائے،شہریوں کامطالبہ۔ گزشتہ روز ایک سروے کے دوران داؤدخیل کے شہریوں جاویدخان،عطاء اللہ خان،ساجد اللہ خان اورحبیب اللہ خان نے کہاکہ داؤدخیل سیمنٹ فیکٹری عرصہ درازسے گردونواح کی آبادیوں کو شدیدمتاثر کررہی ہے۔دن رات فیکٹری کی چمنیوں سے گرد آلود اورزہر آلود دھواں نکلتارہتاہے۔جس سے انسانی اوردیگر جانوروں کی صحت شدیدمتاثر ہورہی ہے۔سانس کی بیماریاں ، خارش، کینسر اوردل کی بیماریوں میں ضلع بھرمیں سب سے زیادہ اس فیکٹری کے گردونواح کے لوگ مبتلاہورہے ہیں۔منصب دارخان،مہرخان، فتح محمد اور شیرعلی خان نے کہاکہ ہماری فصلیں اوردرخت سیمنٹ فیکٹری کے زہرآلود دھواں سے تباہ ہورہے ہیں۔تمباکوکی فصل پر گرد جم جاتی ہے۔اور اس آلودگی کی وجہ سے علاقے سے شیشم کادرخت ختم ہوکے رہ گیاہے۔اور بیری کے درختوں کے پتے بھی شدیدمتاثر ہورہے ہیں۔خان بہادرخان،عبدالقدیر،غلام عباس اور سیف اللہ نے کہاکہ رات کوسوتے میں فیکٹری کی آلودگی کی وجہ سے گھٹن سی محسو س ہوتی ہے اورسانس رکنا شروع ہوجاتاہے۔کئی افراد کوباقاعدہ دمہ کی ادویات اور ان ہیلر کے ذریعے گزارہ کررہے ہیں۔نعیم عباس، عدیل ، کلیم اللہ اور ملک رفیق نے کہاکہ فیکٹری ہم کوآلودگی کازہرتورات دن مہیاکررہی ہے لیکن ہمارے نوجوانوں کوروزگار دیاجاتاہے نہ ہی تعلیم اورصحت کی سہولتیں مہیاکی جاتی ہیں۔محکمہ ماحولیات والوں نے بھی ابھی تک اس آلودگی کے خلاف کوئی ایکشن نہیں لیا۔ہم اپنا اور اپنے خاندان کے علاج پر ماہانا ہزاروں روپے خرچ کررہے ہیں اور فصلوں کی مد میں بھی ہمیں شدیدمالی نقصان اُٹھانا پڑتاہے۔ڈی سی او اورکمشنر سرگودھا اس آلودگی کے خلاف سخت ایکشن لیں تاکہ اس علاقے کاماحول بہترہو اورنئی نسل بہترطریقے سے پروان چڑھ سکے۔ شہریوں نے کہاکہ ہمارے سیاستدان بھی اس سلسلہ میں خاموش تماشائی بنے ہوئے ہیں۔جبکہ داؤدخیل اور گردونواح کے شہری، جانور ، فصلیں اور درخت تباہ ہورہے ہیں۔