داؤدخیل(نامہ نگار)ڈی پی او میانوالی مجاہد اکبرخان نے ضلع بھرکے جملہ جیولری شاپس مالکان،بینک منیجرزاورپٹرول پمپ مالکان کو گورنمنٹ آف پنجاب کی جانب سے جاری کردہ نیشنل ایکشن پلان کے متعلق بریفنگ دیتے ہوئے کہاکہ وہ پٹرول پمپوں،بینکس اورجیولری کی دکانوں پر سی سی ٹی وی کیمرہ جات اور جدید الارم سسٹم نصب کرائیں، وینٹج پوائنٹ قائم کرائیں اور سیکورٹی گارڈز مامورکرائیں ۔ ڈی پی او نے مزید کہا کہ ہوٹل مالکان ہوٹل میں عارضی رہائش رکھنے والے تمام افراد کی فہرستیں 03گھنٹے کے اندر اور مالک مکان 48گھنٹے کے اندر متعلقہ تھانہ کو اطلاع دیں گے۔خلاف ورزی کرنے پر ان کے خلاف پنجاب عارضی رہائش آرڈنینس کے تحت مقدمہ درج کرکے سمری ٹرائل کروایا جائے گا۔اس کے علاوہ جس بینک ۔پٹرول پمپ یا جیولری کی دوکانیں یا بڑے شاپنگ سنٹر پر سی سی ٹی وی کیمرے ،سیکورٹی گارڈ نہ ہونے کی صورت میں مقدمہ درج کر کے سمری ٹرائل کرایا جائے گا جسکی سزا06ماہ یا 50ہزار روپے جرمانہ ہے ۔ضلع بھرکی تمام مساجد پر صرف ایک لاؤڈ سپیکر ہوگا جس میں اذان ،عربی خطبہ،فوتگی اور گمشدگی کا اعلان کرنے کی اجازت ہے ۔خلاف ورزی کرنے پر 06ماہ قید یا25ہزار روپے جرمانہ کی سزا ہو سکتی ہے۔میٹنگ کے اختتام پرتاجر راہنما فلک شیر عوامی نے ملک وقوم کی سلامتی کے لئے دعائے خیر کرائی۔ اس موقع پر ڈی ایس پیز ظفر اقبال سرکل عیسیٰ خیل، بدرمنیر سرکل صدر، فرخ سہیل سرکل پپلاں، حاکم علی نول لیگل، ضیااللہ خان سنبل پی سی ٹی ڈی، ملک غلام محمد ہیڈکوارٹر، انسپکٹر سپیشل برانچ اکرم خان، انچارج سیکورٹی انسپکٹر اللہ نواز خان بھی موجود تھے