داؤدخیل (ذوالفقارخان) قرآن کو صرف پڑھنا ہی مسلمانوں پر فرض نہیں ہے بلکہ اس کو سمجھنا بھی چاہیے کہ اللہ تعالی ہمیں کن باتوں پر عمل کرنے کی تلقین کرتے ہیں۔یمن سعودی عرب کے معاملہ میں فریق بننے کے بجائے ہمیں صلح کے لیے کردار ادا کرنا چاہیے۔ میاں حمزہ شہباز داؤدخیل کو تحصیل کا درجہ دینے کا وعدہ پورا کریں۔ان خیالات کا اظہار جماعت اسلامی پی پی ۴۴ کے گروپ لیڈر اور سابق صدر نیشنل لیبر فیڈریشن پنجاب عبد الوہاب خان نیازی نے داؤدخیل میں مولوی محمد افضل خان سالار مرحوم کے بھائی شیراحمدخان مرحوم کے چہلم میں شرکت کے بعد میڈیا سے خصوصی بات چیت کرتے ہوئے کیا۔ انہوں نے کہا کہ پریشانیوں کا جو سلسلہ جاری ہے وہ صرف قرآن سے دوری کی وجہ سے ہے۔ اگر ہم لوگ صرف قرآن وسنت پر عمل پیرا ہو جائیں تو تما م مسائل اور بیماریوں سے نجات اور ملک میں پھیلی قتل و غارت سے بھی چھٹکارا ممکن ہے ۔انہوں نے یمن کے حوالے سے بات کرتے ہوئے کہا کہ پاکستان کو سعودی عرب میں فوج نہیں بھیجنی چاہیے بلکہ سفارتی تعلقات کے ذریعے یمن اور سعودی عرب کا مسلہ حل کرانا چاہیے اور بالخصوص پاکستان اور ترکی دونوں ممالک سعودی عرب اور یمن درمیا ن صلح کرانے کا کردار اداکرنا چاہیے تاکہ دونوں ممالک میں امن کی فضا بر قرار رہے ۔ عبدالوہاب نیازی نے کہاکہ ضمنی الیکشن میں حمزہ شہباز اور عبیداللہ شادی خیل نے داؤدخیل کو تحصیل کا درجہ دینے کا اعلان اور وعدہ کیاتھا، اب اس وعدہ کو جلد عملی جامہ پہنائیں تاکہ گردونواح کی کثیر آبادیاں مستفید ہوسکیں۔
