داؤدخیل (نامہ نگار) فیکٹری کی آلودگی ہمارے لیے مگر تعلیم اور صحت کے دروازے بند۔بڑے ملازمتوں سے محروم اوربچے تعلیم سے۔ مزید زیادتی برداشت نہیں کریں گے۔سماجی راہنما خلاص خان جھنگے خیل، حبیب اللہ خان کامریڈ اور خلیل الرحمن خان نے کہاکہ جہاں بڑے صنعتی یونٹ لگائے جاتے ہیں ، گرد و نواح کی آبادیوں کو مفت تعلیم اور صحت کی سہولیات مہیا کرنا ان یونٹس کی بنیادی ذمہ داری سمجھا جاتا ہے ۔ مگر بدقسمتی سے داؤدخیل میں سیمنٹ اور کھاد فیکٹری کے بہت بڑے کارخانے پچپن سال سے چل رہے ہیں لیکن گردونواح کو تعلیم وصحت کی سہولتیں نہیں دی جارہیں۔ محمداقبال ملک، امان اللہ خٹک اور غلامحمد نے کہاکہ سیمنٹ فیکٹری کے دو سے چار پلانٹ وجود میں آچکے ہیں۔ ان کارخانوں کے زیرِانتظام ہاؤسنگ کالونی اسکندرآباد میں تین ہائی سکولز (بوائز، گرلز) چل رہے ہیں۔ یہاں صرف کارخانوں کے ملازمین کے بچوں کو داخلہ دیاجاتاہے جبکہ بہت قلیل تعداد میں گردونواح کی آبادیوں کے بچوں کو داخلہ دیاجاتاہے اور وہ بھی بھاری فیس کے عوض۔ جبکہ انٹر گرلز کالج میں بھی داخلہ بھاری فیس کے عوض دیاجاتاہے۔سید حسن رضا شاہ، سید الیاس رضا اورسابق نائب ناظم سید شمیم عباس نے کہاکہ اس بار ہاؤسنگ کالونی کی انتظامیہ نے اپنے ماڈل سکول میں گردونواح کے بچوں کو داخلہ نہ دینے کا اعلان کردیاہے۔ جس سے درجنوں طلبا و طالبات تعلیم سے محروم ہوجائیں گے۔ انتظامیہ گنجائش نہ ہونے کا عذر بیان کررہی ہے جبکہ اربوں روپے والے اداروں کے لیے ایک سیکشن کا اضافہ کرنا کوئی مشکل کام نہیں۔ گردونواح کے درجنوں والدین بہت پریشان ہیں۔ محکمہ ایجوکیشن کے ضلعی اور صوبائی حکام اس زیادتی کا فوری نوٹس لیں تاکہ نئے تعلیمی سال میں بچے تعلیم کے بنیادی حق سے محروم نہ ہوں ۔عبدالستار خان نیازی، ملک عبدالعزیز اور ملک غلام عباس نے کہاکہ گردنواح کی آبادیوں کو صحت کی سہولت بھی حاصل نہیں۔ بھاری کنسلٹنٹ فیس وصول کی جارہی ہے اور ادویہ کا خرچ الگ سے اُٹھانا پڑتاہے۔انتظامیہ کو صنعتی ایکٹس کی پابندی کرتے ہوئے مقامی آبادیوں کو تعلیم اور صحت کی سہولتیں باہم پہنچانی چاہیے۔شہریوں نے کہاکہ اگر ہمارے بچوں کو تعلیم کی سہولت مہیانہ کی گئی تو ہم وسیع پیمانے پر احتجاج کریں گے۔