داؤدخیل (نامہ نگار)داؤدخیل میں دو سال سے نہ ہی ایم پی اے پی ٹی آئی اور نہ ہی ایم این اے مسلم لیگ ن کی جانب سے کوئی فنڈز مل سکے جس کی وجہ سے شہر کی سڑکیں ٹوٹ پھوٹ کا شکار ہیں اور کئی گلیاں سیوریج نہ ہونے کی وجہ سے عوام کے لیے عذاب بن چکی ہیں۔ اب عوام اپنی مدد آپ کے تحت کام کرنے پر مجبور ہوچکے ہیں۔ ان خیالات کا اظہار نئی آبادی اور محلہ شکور خیل کے رہائشیوں نے میڈیا سے بات چیت کرتے ہوئے کیا۔امیر عبد اللہ خان ،رحمت اللہ خان اورفیض اللہ المعروف کیپٹن نے کہا کہ میں نے اپنی د وبکریاں بیچ کر ا س سڑک پر روڑہ ڈالنے کے لیے چندہ دیا ہے۔ ہم نے ووٹ بھی مسلم لیگ ن کے ایم این اے کو دیئے اور کئی باراس مسئلے کی طرف توجہ بھی دلائی لیکن کوئی شنوائی نہیں ہوئی ۔اب مجبور ہو کر اپنی مدد آپ کے تحت کام کروا رہے ہیں ۔جاوید خان ،عزیز اللہ خان ،عبد اللہ خان امیر جماعت اسلامی اورارسلا خان نے کہا کہ دو سال سے زائد کا عرصہ گزر جانے کے باوجود ابھی تک شہر میں کوئی فنڈ حکومت کی جانب سے نہیں آیا ۔سو گھروں پر مشتمل ہمارے محلے کے لوگوں نے مسلم لیگ ن کے ایم این اے عبید اللہ خان شادی خیل کو ووٹ بھی دیے انہوں نے وعدہ بھی کیا کہ آپ کو واٹر سپلائی ،سیوریج اور سڑ ک کی تعمیر کرا دوں گا لیکن افسوس کے سب وعدے جھوٹ ثابت ہوئے ہیں۔ اہلِ محلہ نے کہاکہ آج ہم چندہ جمع کر کے سڑک پر روڑہ بھی ڈلوا رہے ہیں تاکہ بارش کے دنوں میں آسانی کے ساتھ گزر سکیں ۔ ان ٹریکٹر مالکان کا اللہ بھلا کرئے کہ ہم سے ڈیزل کی رقم لیکر یہ ڑوڑہ ڈال کر دے رہے ہیں۔حکومتی نمائندہ کی طرف داؤدخیل کو انتقامی سیاست کی بھینٹ چڑھایاجا رہا ہے۔ انہوں نے پی ٹی آئی کو بھاری اکثریت سے کامیاب کرایا تھا جس کی سزا پورا شہر برداشت کر رہاہے۔