داؤدخیل (نامہ نگار)نہ جانے کب الیکشن میں عوام سے کیے گئے وعدے پورے ہوں گے اور غریب عوام سکھ کا سانس لیں گے۔ داؤدخیل شہر میں سیوریج کی بند لائنوں نے عوام کو ذہنی مریض بنا دیا۔ اب تو معذور بھی میونسپل کمیٹی انتظامیہ کے خلاف پھٹ پڑے اور انہیں بد دعائیں دینے لگے۔ داؤدخیل کے محلہ سمال خیل کے معذور چاچا عبد اللہ خان اور قاسم خان نے میڈیا کو بتایا کہ ہمارے محلہ کی تما م سیوریج لائنیں اس وقت مکمل طور پر بند ہو چکی ہیں اور گلیوں میں گندہ پانی کھڑا ہے۔ کئی گلیاں ایسی ہیں جن میں سے گزرنا بھی محال ہے۔ ان گلیوں سے گزرناتندرست آدمی کے لیے مشکل ترین کام بن چکاہے ۔ہم تو معذور ہیں ۔ تین ماہ سے اس گندے پانی کی وجہ سے گھر میں محصور ہو کر رہ گئے ہیں ۔گھرمیں پڑے پڑے ذہنی مر یض بن گئے ہیں۔ ہمارے محلے کو ہمارے سابق ناظم غلام شبیر خان کاپی ٹی آئی کا ساتھ دینے کی وجہ سے سزا دی جا رہی ہے۔ معذور افراد نے کہاکہ ظالم اور حرام خور سی او کو اگر انتظامیہ نہیں پوچھتی تو اللہ ایک دن ضرور پوچھے گا۔اس سی او کی وجہ سے پورا شہر مفلوج ہو کر رہ گیا ہے ۔حمید اللہ خان، عزیزاللہ خان اور محمد حنیف خان نے کہاکہ اس سیوریج کے پانی کی وجہ سے محلے کے معصوم بچے پانی سے گزر گزر کر بیمار ہو رہے ہیں سمال خیل کے معذور اور دیگرافراد نے وزیر اعلی پنجاب میاں شہباز شریف ،ڈی سی ا و میانوالی سے اپیل کی ہے کہ از خود نوٹس لے کر ان بند لائنوں کو کھلوا کر عوام کو اذیت سے چھٹکارہ دلایا جائے ۔
