داؤدخیل (نامہ نگار) تین سال قبل داؤدخیل کے لیے نادرا آفس کی منظوری ہونے کے باوجود ابھی تک عوام کے لیے نہیں کھل سکا۔ سروے میں داؤدخیل کے شہریوں عاطف نیازی ،مطیع اللہ خان ،کلیم اللہ زرگر نے کہا کہ پیپلز پارٹی کے دور میں سابق ایم این اے نے داؤدخیل میں نادراآفس منظور کرایا ، جس کے تمام سرکاری معاملات طے ہوئے۔ نادرا افسران نے دورے کر کے ملازمین اور جگہ تک کا تعین کیا گیا لیکن تاحال اس کو چالو نہ کرنا سمجھ سے بالاتر ہے۔ذیشان علی، فاروق خان ، ابوبکر خان اور محمد عثمان نے کہاکہ لگتاہے نادرا کو ہمارے شہر میں لا کر حکومتی نمائندوں نے اغوا کرکے اپنے آبائی شہر میں بسا دیاہے۔نادرا آفس کی مبینہ منتقلی پر ذمہ داران کے خلاف قانونی کارروائی عمل میں لائی جانی چاہیے۔ الطاف ملک ،فیاض ،امیر عبد اللہ خان نے کہا کہ داؤدخیل نادرا آفس کے قیام سے داؤدخیل کے علاوہ گردنواح کے علاقوں پکی شاہ مردان ،گلن خیل ،ماڑی انڈس ،اسکندرآباد ،ٹھٹھی ،ڈھیر امید علی شاہ ،پائی خیل تک کے عوام نادرا آفس سے مستفید ہوں گے لیکن مسلم لیگ ن کی حکومت نے داؤدخیل نادرا آفس کو رکوا دیا کیونکہ انہیں داؤدخیل سے الیکشن میں شکست ہوئی تھی جس کا بدلہ لیا جا رہا ہے۔ فضل الرحمن ،ملک ،عبدالرحمن ، یونس خان اور زیڈ کے نیازی نے کہا کہ دو سال سے زائد کا عرصہ گزر جانے کے باوجود تمام ضروری قانونی کارروائی کے تقاضے پورے ہو نے کے باوجود دفتر کا نہ کھلنا انتقامی سیاست کے سوا کچھ نہیں۔ الیکشن میں عوام سے کیے گئے وعدے موجودہ حکومت نے ابھی تک پورے نہیں کیے اور دوسری حکومت کی جانب سے منظور ہونے والے کاموں میں بھی رکاوٹ ڈال کر عوام کو ذلیل کیا جا رہا ہے ۔ جاوید ملک،عزیزاللہ خان،غلام محمد اور شفیع اللہ خان نے کہاکہ مبینہ طور پرمسلم لیگ ن کے ایم این اے نادرا آفس کو اپنے آبائی گاؤں شفٹ کرا کے لے گئے ہیں ۔اگر ایسا ہو ا تو یہ داؤدخیل کی عوام کے ساتھ سراسر زیادتی ہو گی ۔
