داؤدخیل (نامہ نگار)مسلم لیگ ن کی حکومت کو اڑھائی سال کا عرصہ گزر جانے کے باوجود ابھی داؤدخیل شہر میں ایک روپے کا فنڈز بھی نہیں لگ سکا اور الیکشن میں عوام سے کیے گئے مسلم لیگ ن کے قائدین کا ایک وعدہ بھی وفا نہ ہوسکا ۔اب داؤدخیل کے عوام اپنی مدد آپ کے تحت چندہ کر کے کام کرانے پر مجبور ہیں ۔مسلم لیگ ن کے ایم این اے عبید اللہ خان شادی خیل کے قریبی ساتھی سماجی ورکر ماما حق نواز نے گھر گھر جا کر چندہ اکٹھا کرنا شروع کر دیا اور جامع مسجد شکور خیل سے لیکر نئی آبادی ریلوے لائن تک خستہ حال گلی میں روڑہ ڈال کر عوام کو شدید مشکلات سے نجات دلانے کے لیے سر گرم ہو گئے ہیں ۔انہوں نے مزید کہا کہ اڑھائی سال سے زائد کا عرصہ گزر جانے کے باوجود ابھی تک کوئی ترقیاتی کام نہیں ہوا ہے اور ہمارے محلہ جس میں تقریبا چار سو زائد گھر آبا دہیں لیکن نہ ہی اس کی گلی میں کوئی سیوریج لائن بچھائی گئی ہے اور نہ ہی پختہ بنایا گیا ہے حالانکہ مسلم لیگ ن کے منتخب ایم این اے عبید اللہ خان شادی خیل نے ہمارے ساتھ وعدہ کیا تھا کہ اگر میں الیکشن جیت گیا تو آپ کو واٹر سپلائی ،سیوریج ،اور روڈ بنا کر دوں گا لیکن وہ وعدے صرف وعدے ہی رہے۔ اب اہلیان محلہ اپنی مدد آپ کے تحت چندہ کر کے گلی میں روڑہ ڈالوا کر گزرنے کا راستہ بنا رہے ہیں۔ انہوں نے کہاکہ شہر کے عوام کے ساتھ اس طرح کی ظلم زیادتی آئندہ الیکشن میں امیدواروں کے لیے نقصان دہ ثابت ہو گی ۔
