داؤدخیل (ذوالفقارخان سے)اپنے پٹھان بھائیوں کے لیے ہر ضلع میں فری ایمبولینس اور بلڈ بنک قائم کریں گے تاکہ ان کی تکالیف کا ازالہ ہو۔ ان کے بچوں کے لیے تعلیم کے مواقع مہیاء کریں گے تاکہ ان کے بچے بھی اچھے سکولوں میں تعلیم حاصل کر سکیں ان خیالات کا اظہار پٹھان اتحاد ویلفیئر ایسوسی ایشن کے مرکزی صدر صاحبزادہ سید آغا مصطفی گیلانی نے میانوالی میں پٹھانوں کے جلسہ عام سے خطاب کرتے ہوئے کیا اور پٹھان اتحاد ویلفیئر ایسوسی ایشن کی باڈی بھی تشکیل دی۔ انہوں نے کہا کہ جو عہدیدار منتخب ہوئے ہیں اگر یہ اپنے بھائیوں کی فلاح کے لیے کام کریں گے تو ٹھیک ورنہ فارغ اور جو کام کریں گے وہ ہمارے ماتھے کا جھومر ہونگے۔ انہوں نے کہا کہ سب سے بڑا مسئلہ تعلیم کا ہے اگر ہم تعلیم حاصل نہیں کر سکیں گے ہم ترقی نہیں کر سکیں گے ۔جس قوم میں تعلیم ہو گی وہی ترقی کرے گی۔ 1947,65,71کی جنگوں میں ہمارے آبا واجداد نے ملک کے لیے اپنی جانوں کی قربانیاں دیں اور آج ہم اپنے ملک میں اجنبی سے ہو کر رہ گئے ہیں۔ہمارے دادا ،باپ کے شناختی کارڈ بنے ہوئے ہیں لیکن آج ہمارے پٹھان بھائیوں کے کارڈ نہیں بنائے جا رہے جو کہ ظلم ہے اگر ہم پاکستانی ہیں تو ہمیں ہمارا حق دیا جائے۔ مرکزی چیئرمین امین اللہ کمرانی نے کہا کہ میں میانوالی انتظامیہ کا مشکور ہوں جس نے ہمیں ان حالات میں جلسہ کرنے کی اجازت دی اور سیکورٹی بھی مہیاکی۔ جب بھی ضرورت پڑی ہم پٹھان اپنے خون کا آخری قطرہ تک میانوالی پر قربان کر دیں گے۔ پٹھان پاکستان کی دھرتی کے بیٹے ہیں ۔ہم پر امن لوگ ہیں دہشت گرد نہیں ہیں لیکن پھر بھی ہمارے ساتھ حکومت کی جانب سے سوتیلی ماں جیسا سلوک کیا جا رہا ہے ۔پولیس سر عام ہمارے گھروں میں گھس جاتی ہے ۔ہم عزت دار لوگ ہیں ہماری عزتوں کو پامال نہ کیا جائے ورنہ ہم لوگ بھی مجبور ہو جائیں گے ۔ہماری جماعت کا کسی سیاسی جماعت کے ساتھ کوئی تعلق نہیں ہے یہ صرف پٹھانوں کی ویلفیئر کے لیے کام کرے گی تاکہ ان کو مختلف ضلعوں میں در پیش مسائل سے نجات دی جائے نہ ہمارے بچوں کے لیے کوئی تعلیم کا بہتر نظام ہے اور نہ ہی پارلیمنٹ میں ہمارے لیے کوئی نمائندہ آواز بلند کرتا ہے۔ ضلعی صدر بابر خان نے کہا کہ میانوالی میں دفتر قائم کر دیا ہے جس بھائی کو کوئی بھی مسئلہ ہو وہ آئے اس کا ہر جائز کام تر جیحی بنیادوں پر حل کیا جائے گا اور ہماری تنظیم ضلع میانوالی کی ترقی میں آپ لوگوں کے شانہ بشانہ کھڑی ہو گی ۔
