داؤدخیل( نامہ نگار) ڈاکٹر جسم کا اوراُستاد روح کا علاج کرتاہے۔ استاد اداروں سے رخصت ہوتے مگر دلوں میں ہمیشہ رہتے ہیں۔ٹیچنگ غیر فانی پیشہ ہے۔ ریٹائر ہونے والے کو خدا حافظ اور نئے آنے والے کو خوش آمدید کہنا زندہ قوموں کی روایات ہیں۔ نسلیں سدھارنے والے اساتذہ اللہ کے ہاں بھی سرخرو ہوں گے۔ یہ باتیں سینئر ہیڈماسٹر جاوید اقبال ملک، اختر اقبال ملک، عاصم بخاری و دیگر نے گزشتہ روز گورنمنٹ بوائز سیکنڈری سکول پکی شاہمردان میں ٹیچر سید فضل عباس کی ریٹائرمنٹ اور ملک رمیز اقبال کی بطورِ ایس ایس ٹی تقرری پر الوداعی اور استقبالیہ تقریب کے شرکاء سے خطاب کے دوران کہیں۔ جاوید اقبال ملک نے کہاکہ جو استاد نئی نسل کی آبیاری کرتاہے اُسے آئندہ نسلیں بھی نہیں بھولتیں۔ پرائمری استاد تو بنیاد رکھنے والا ہوتاہے۔ وہ طالب علم کی روح کا حصہ بن جاتاہے۔ اختر اقبال ملک نے کہاکہ درس و تدریس خدمت اور نیکی والا پیشہ ہے جس کا اجر کبھی ختم نہیں ہوتا۔ استاد بچے کو جینا سکھاتا اور تربیت کرتاہے۔ ملک رمیض اقبال نے کہاکہ سینئر کی راہنمائی سے فائدہ اُٹھاؤں گا اور استاد کا اصل مشن کبھی نظروں سے اوجھل نہیں ہونے دوں گا۔ سید عاصم بخاری نے سید فضل عباس کے اعزاز میں اپنا تازہ کلام پیش کیا اور سٹیج سیکریٹری کے فرائض بھی سرانجام دیئے۔ آخر پہ سید فضل عباس شاہ نے تمام اساتذہ کا شکریہ ادا کیا۔ تقریب سے پہلے ریٹائرڈ ہونے والے استاد سید فضل عباس شاہ کوطلبہ نے گارڈ آف آنر پیش کیا۔ پھولوں کی پتیاں نچھاور کرکے استاد کو سکول میں لایاگیا۔ تقریب کے اختتام پر ظہرانہ اور سٹاف کی طرف سے تحائف پیش کیے گئے۔
