داؤدخیل(نامہ نگار) والدین بچے کو آسمان سے زمین پر اور استاد زمین سے آسمان پر پہنچاتاہے۔ پرائیویٹ سکولز کی ظاہری خوبصورتی کے پیچھے بھاگنا معاشرتی المیہ ہے۔ ہیڈماسٹر جرات اور اختیار سے کام کریں تو تبدیلی یقینی ہے۔ استاد نسلیں بناتا بھی ہے اور بگاڑتابھی ہے۔ یہ باتیں گزشتہ روز گورنمنٹ بوائز سکول کینال کالونی داؤدخیل میں پیک امتحانات میں مرکز داؤدخیل کے پوزیشن ہولڈرز طلبہ اور اساتذہ میں تقسیمِ انعامات کی منعقدہ تقریب سے مہمانِ خصوصی ڈی ای او ایلیمنٹری فضل الٰہی، اے ای او سید ضیاالدین شاہ اور ہیڈماسٹر سید قاسم عباس ودیگر نے خطاب کے دوران کہیں۔ ڈی ای او فضل الٰہی نے کہاکہ بقول سکندراعظم والدین بچے کو آسمان سے زمین پر اور استاد زمین سے آسمان پرپہنچاتاہے۔ سرکاری سکولز کا ٹیچر تعلیم یافتہ اور تربیت یافتہ ہے۔ یہاں تعلیم و تربیت کا بہتر انتظام ہے۔ مگر معاشرتی المیہ ہے کہ لوگ پرائیویٹ سکولز کے ظاہری حُسن کے پیچھے بھاگتے ہیں۔ انہوں نے کہاکہ ہم صوبائی مفاد اور بہتر تعلیم عمل کے لیے آٹھ مسجد مکتب ضم اور اٹھائیس کو اپ گریڈ کردیاہے۔انہوں نے یقین دلایاکہ ڈی ایم او آفس میں بیٹھا گورنمنٹ ایلیمنٹری سکول ڈھیر امید علی شاہ کے سائنس ٹیچر کو جلد واپس لانے کے لیے افسران بالا کو تحریری طور پر آگاہ کروں گا۔ ڈی ای او نے کہاکہ پہلے ای ڈی او آفس کا ایک اہلکار صرف من پسند سکولز کو بار بار ایک ہی مد سے ترقیاتی فنڈز جاری کرتا تھا مگر اب ہم اپنے حصہ کے فنڈز کی منصفانہ تقسیم کو یقینی بنا رہے ہیں۔مرکز داؤدخیل کو ضرورت کے ترقیاتی فنڈز ضرور دیں گے۔ ڈپٹی ڈی او پپلاں آفتاب احمد اور ڈپٹی ڈی ای او تحصیل میانوالی محمد مدنی نے اعلیٰ کارکردگی پر مرکز داؤدخیل کے طلبہ اور اساتذہ کو خراجِ تحسین پیش کیا۔اے ای او مرکز داؤدخیل سید ضیا الدین شاہ نے کہاکہ ہیڈماسٹر کو صرف ری کمنڈیشن کے نہیں پنشمنٹ کے اختیار بھی دیئے جائیں ۔ ہیڈماسٹر ز صحیح کام کریں تو تبدیلی یقینی ہے۔مرکز داؤدخیل کے اساتذہ اور طلبہ کی محنت نے پیک کے امتحانات میں مرکز کو اول مقام پر لاکھڑا کیاہے۔انہوں نے کہاکہ ڈی ای او نے اپنی صوابدید پر کچھ سکولز کو فنڈز جاری کیے ہیں ورنہ ترقیاتی فنڈز سے میرے مرکز کو ایک روپیہ بھی نہیں ملا۔انہوں نے کہاکہ ایلیمنٹری سکول کینال کالونی میں ضلع کی سب سے عمدہ چالیس لاکھ روپے لاگت کی کمپیوٹر لیب بنائی گئی ہے مگر آئی ٹی ٹیچر نہ ہونے سے طلبہ کا نقصان ہو رہاہے۔ ہیدماسٹر سیدقاسم عباس نے کہاکہ استاد نسلیں بناتا بھی ہے اور بگاڑتابھی ہے۔ پڑھو پنجاب ، بڑھو پنجاب کے مشن پر ہم علم پیرا ہیں۔انہوں نے کہاکہ اچھا منتظم بہتر سہولت کار کے ساتھ ساتھ سخت بھی ہوتاہے جیسا کہ ہمارے مرکز کے اے ای او سید ضیاالدین شاہ ہیں۔ماسٹر ظفراللہ خان اور ڈی ای او فضل الٰہی نے اپنا اپنا سنجیدہ اور مزاحیہ کلام بھی پیش کیا۔تلاوت کی سعادت محمد مہربان، نعت کی سعادت حمزہ شفیق اور عمران علی نے حاصل کی۔ ملی نغمہ محمد مہربان اور آئی ایس پی آر کا جاری کردہ مشہور گیت محمد اویس خان نے پیش کرکے شرکاء کے دل موہ لیے۔سٹیج سیکرٹری کے فرائض معظم شہزاد نے سرانجام دیئے۔ تقریب کے آخر پر محفل موسیقی میں ماسٹر اصغر خان نے لوک گیت پیش کیے۔تقریب میں ضلع میانوالی کے کئی مراکز کے اے ای او صاحبان ریاض خان، قیوم نواز، افضل خان، اسلم خان، ملک عطا اللہ اور قاضی نذیر نے خصوصی شرکت کی۔ اس کے علاوہ مرکز داؤدخیل کے چھ ایلیمنٹری اور پچیس پرائمری سکولز کے ہیڈماسٹرز اور پوزیشن ہولڈرز طلبہ بھی شریک ہوئے۔ تقریب کے آغاز پر مہمانانِ خصوصی کا شاندار استقبال کیاگیا۔ گارڈ آف آنر کے ساتھ پھولوں کی پتیاں نچھاور کی گئی۔ بعض طلبہ نے سکول کی چھت پر کھڑے ہو پھولوں کی پتیاں نچھاور کیں۔ایلیمنٹری سکولز اُتراں کلاں، کوٹ بیلیاں ، ماڑی شہر اور دیگرکے طلبہ نے پیک کے امتحانات میں نمایاں پوزیشنز حاصل کیں۔یہ تقریب ہیڈماسٹر شفااللہ ملک، عبدالعزیز ملک،ظفراللہ جمالی، معظم شہزاد، سید شبیر شاہ اور تاج محمد اعوان کے زیرِ انتظام سرانجام پائی۔