داؤدخیل ( ذوالفقارخان) شکاگو کے مزدوروں کا آج کے مزدور پر بڑا احسان ہے۔آج پاکستان کے کئی سرکاری محکمے بیگار کیمپ کا نقشہ پیش کررہے ہیں۔ قرآن خوانی سے زیادہ قرآنی فہمی کی معاشرے کو ضرورت ہے۔ قرآن ہمارے لیے روحانی کیپسول ہے۔ انسان زمین پر اللہ کا نائب ہے۔قصاص میں زندگی ہے۔ زکواۃ سے محبت اور سود سے نفرت پیدا ہوتی ہے۔نکاح آسان ہوگا تو زنا کا راستہ بند ہوگا۔حکمرانِ وقت کے لیے صلاحیت اور صالحیت لازم و ملزوم ہیں۔دین نظامِ زندگی ہے۔ اللہ کی راہ میں ناکامی کا وجود ہی نہیں ہوتا۔ یہ باتیں یکم مئی اور درسِ قرآن کے حوالے سے کلو ہاؤس ماڑی انڈس میں منعقدہ تقریب سے مقررین نے شرکاء سے خطاب کے دوران کہیں۔ماہرِ تعلیم حافظ محمد مشتاق خان نے کہاکہ ساری مخلوق جتناکچھ حاصل کرلے اللہ کے خزانوں میں رتی برابر بھی فرق نہیں پڑتا۔ اللہ کو ساری مخلوق کے نیک یا بد ہوجانے سے کوئی فرق نہیں پڑتا بلکہ یہ انسان کا اپنا نفع نقصان ہے۔ نماز کے بغیر انسان مردہ روح کا مجسمہ ہے۔ ووٹ کی پرچی بھی ہمارا عمل ہے اگر ہم اسے ٹھیک استعمال کریں گے تو صالح قیادت ملے گی۔نیشنل لیبر فیڈریشن پنجاب کے سابق صدر عبدالوہاب نیازی نے کہاکہ میدانِ عمل میں کودنے والوں کی اللہ دُعائیں قبول کرتاہے۔حضرت حسینؓ نے میدان میں شہادت پیش کی اور امام ابوحنیفہ رح نے حق کی خاطر جیل میں شہادت پیش کردی۔ جبکہ آج کے اکثر مُلا ، ذاکر، پیر حق کی بات کرنے کے بجائے حکمرانوں کے تلوے چاٹ رہاہے۔
آج ہماری عبادات بس رسم بن کے رہ گئی ہیں۔ ڈاکٹر عبدالرزاق خان نیازی نے کہاکہ دین کی کمائی بھی مزدوری ہے۔ ہمیں اپنی انفرادی زندگی بہتر بنانی ہوگی تب اجتماعی زندگی بدلے گی۔ شکاگو کے مزدوروں نے آٹھ گھنٹے کام کے مقرر کرا کے آج کے مزدور پر احسانِ عظیم کیاہے مگر پاکستان میں اب پھر بندہ مزدور کے اوقات بہت مشکل سے گزر رہے ہیں۔ حتیٰ کہ محکمہ پولیس جیسے سماجی محکمہ میں ملازمین چوبیس چوبیس گھنٹے ڈیوٹی دینے پر مجبور ہیں۔ اسراف والے زمین پر فساد پھیلاتے ہیں۔ قتلِ عام والی دہشت گردی کے ساتھ ساتھ معاشی دہشت گردی کا خاتمہ بھی ضروری ہے۔ ایماندار تاجر قیامت کے روز انبیاء کے ساتھ ہوگا۔ مزدور راہنما الطاف حسین کلو نے کہاکہ قرآن ہی ہمارا دستورِ حیات ہے۔ ہمیں مقام حسین کے ساتھ ساتھ پیغام حسین اور قیامِ حسین کو سمجھنے کی ضرورت ہے۔ ہماری سیاست دین کے گرد گھومتی ہے اور لوگوں کا دین سیاست کے گرد۔ عبداللہ خان نے کلامِ اقبال پیش کیا۔ اس تقریب میں امجد عباس خان، سابق ناظم سید الفت حسین بخاری، سید تجمل حسین، سید سجاد حسین،ممتاز ملک ، حبیب اللہ خان، عصمت اللہ خان، محمد حفیظ اعظمی، محمد سعید اعظمی، قمر عباس، معظم شہزاد، پرنسپل ملک نواب علی،ناصر عباس ناصر، ترجمان پی ٹی آئی مولوی عظمت اللہ خان، قاسم خان، لالہ رمضان ،محمد علی کلواور دیگر درجنوں افراد نے شرکت کی۔تقریب کے اختتام پر میزبان کی طرف سے ظہرانہ دیا گیا۔

QR Code: