عمران خان فرماتے ہیں کہ قصور واقعہ میں پنجاب کے سیاستدان اور پولیس ملوث ہے۔عمران خان کی اہلیہ متحرمہ فرماتی ہیں سانحہ قصور حکومت کی نااہلی کا نتیجہ ہے۔محمود الرشید کہتے ہیں کہ قصور واقعہ حکومت کی گُڈ گورننس پر طمانچہ ہے۔ آصف زرداری ارشاد کرتے ہیں کہ قصور واقعہ پنجاب حکومت کے چہر ے پر بدنما داغ ہے۔چوہدری شجاعت تھرتھراتے ہوئے گویا ہوتے ہیں کہ قصور کیس حکومتی ناکامی ، مجرموں کو کلمہ چوک میں پھانسی دی جائے۔بلاول زرداری نے بھی اسے پنجاب حکومت کے منہ پر طمانچہ قرار دیاہے اور فریال تالپور نے اسے حکومت کی بے حسی کی انتہا قرار دیاہے۔
الغرض جتنے منہ اُتنی باتیں۔ اگر میں یہاں سیاستدانوں کے بیانات اور والدین،صحافی، اساتذہ،دکاندار، ریڑھی بان، کوچوان،سول سوسائٹی اور دیگر شعبہ ہائے زندگی سے تعلق رکھنے والے افراد کی باتیں شیئر کروں تو ایک کالم کا حجم کم پڑجائے۔چند مستثنیات کے ساتھ ہر کسی نے ارشاد فرمایاکہ سانحہ قصور حکومت کی نااہلی کی وجہ سے ہوا ہے۔ قصور واقعہ میں سارا قصور حکومت کاہے۔
یہ سب سے سستا،سطحی اور آسان بیان ہے کہ اس سانحہ کی ذمہ دار حکومت ہے۔ اس میں کون سی بڑی سائنس ہے ۔ جب ہم ایک ریاست میں رہتے ہیں تو اُس ریاست کے اچھے بُرے کی حکومت تو ذمہ دار ہوتی ہے۔ مگر ہر سانحہ میں حکومت ذمہ دار نہیں ہوتی بلکہ حکومت تو سانحہ کے ذمہ داران کو قرار واقعی سزا دیتی ہے۔ حکومت عام آدمی یا مخالف سیاستدانوں کی طرح جذباتی بھی نہیں ہوتی کہ آؤ دیکھا نہ تاؤ اور بھاؤ شروع کردیا۔حکومت کو ہر سانحہ کی وجوہات پر سوچ سمجھ کے آگے بڑھنا ہوتاہے۔ حکومت میں موجود تمام ادارے ایسے واقعات پر قدم در قدم آگے بڑھتے ہیں۔ اداروں کے اندر موجود کالی بھیڑوں کو بھی بے نقاب کیاجاتاہے۔ اور پوری کوشش کی جاتی ہے کہ افراتفری میں کہیں بے گناہ بھی نہ رگڑے جائیں۔
اگر ہم سب غور کریں تو اس سانحہ کی ذمہ دار صرف حکومت نہیں ہے۔ اس میں حکومت کی نااہلی نہیں ہے بلکہ اس سانحہ کے ذمہ دار سب سے پہلے والدین ہیں۔ جو بچے پیداکرنے کے لیے توسر دھڑکی بازی لگادیتے ہیں۔کچھ عرصہ اللہ کی طرف سے بچے کے عطا کرنے میں دیر ہوجائے تو بے صبرے ہوجاتے ہیں اور پیرفقیراورمزاروں کارُخ کرلیتے ہیں۔ کئی جعلی پیروں کے ہاتھوں یرغمال بن جاتے ہیں۔ کئی نیم حکیم کے ہتھے چڑھ جاتے ہیں۔ بڑے بڑے مہنگے علاج کرا کے اولاد جیسی رحمت و نعمت حاصل کرتے ہیں۔بے اولاد جوڑے کو تو معاشرہ بھی عجیب قابلِ رحم نظروں سے دیکھتا اور تبصرے فرماتاہے۔ الغرض والدین کے لیے ایسے لگتاہے کہ شادی کا سب سے اعلیٰ وارفع مقصد ہی اولاد پیدا کرنا ہے۔ اکثر تو پھر شادی کا مقصد ہی اولاد پیدا کرنا بنا لیتے ہیں۔ چادر دیکھ کے پاؤں پھیلائیں کے قول کو جوتی کی نوک پہ رکھتے ہیں ۔ بچے پیدا کرکے معاشرے کے حوالے کرتے جاتے ہیں۔کوئی تربیت نہیں ، کوئی پوچھ تاچھ نہیں ، بچوں کو وقت تک نہیں دے پاتے۔ بچوں کی ضروریات کا خیال نہیں رکھ پاتے۔ کوئی حد میں ہوں تو ضروریات پوری کرپائیں۔ کوئی اپنی اولاد کو لاڈ پیار میں ڈبو رہاہے۔ کوئی اپنی بداخلاقیاں اپنی اولاد کو منتقل کررہاہے۔
والدین کے بعد ایسے سانحہ کے ذمہ دار معزز اساتذہ کرام بھی ہیں۔ جن کو بچے اپنے مجازی خدا سے کم کادرجہ نہیں دیتے۔ والدین سے بڑھ کر اپنے اساتذہ کی قدر کرتے ہیں۔ بچے اپنے اساتذہ کا حکم بجالانا اعزاز سمجھتے ہیں۔مگر کتنے اساتذہ ہیں جو ان بچوں کو اپنی اولاد سمجھتے ہیں۔ کہتے تو سارے یہی ہیں کہ یہ بچے ہماری اولاد ہیں۔ مگر بچوں کی تعلیمی اور اخلاقی حالت دیکھیں تو لگتاہے کہ یہ اساتذہ بچوں کے والدین نہیں دُشمن کا درجہ رکھتے ہیں۔ اور اگر والدین ہیں بھی تو پھر منافق والدین کا درجہ رکھتے ہیں۔ آج اکثر سرکاری سکولز میں بچوں کی حالتِ زار اور پرائیویٹ سکولز میں بچوں کی بداخلاقیاں اساتذہ کے قول و فعل میں تضاد کا منہ بولتا ثبوت ہیں۔
آج معاشرہ جو اس سانحہ پر بڑا سیخ پا ہورہاہے۔ جو ملزمان کو پھانسی پہ چڑھانے کے لیے بے چین نظر آتاہے ۔ یہ اُس وقت کہاں تھاکہ دس سال سے یہ دھندا جاری تھا۔کیا اُس وقت بھی یہی سیاست دان اور یہی حکمران تھے؟ میڈیا کو تو ایسی خبریں ملتی ہی تب ہیں جب گلی گلی چرچا ہوجاتاہے۔ میڈیا تو خبر بریک کرنے میں پھر دیر نہیں لگاتا مگر ہماری دم توڑتی معاشرت والا معاشرہ سول سوسائٹی کہاں تھی۔ پہلے واقعہ پر اگر یہ معاشرہ بے خبر تھا تو مانا جاسکتاہے۔ ایک دن تک بے خبری بھی مانی جاسکتی ہے۔ چلیں پانچ چھ واقعات تک لاعلمی اور چھ ماہ سال تک بے خبری بھی قابلِ قبول مان لیں حالانکہ ایسا ہوتا نہیں ہے لیکن یہاں تویہ سانحہ پورے دس سال سے جاری ہے۔یہ معاشرے کی بے خبری نہیں بے حسی اور خودغرضی کی انتہا ہے۔
موٹررکشا والا ہو یا ہائی ایس والا یہ سب ان حالات سے باخبر تھے۔ لیکن کسی کو خیال نہ آیا کہ اس گناؤنے کھیل کو روکنے کے لیے آگے بڑھا جائے۔ قرب و جوار کے دکاندار اور ہوٹلز والے بھی بے خبر نہیں ہوسکتے مگر سب نے چُپ سادھے رکھی۔ کیا یہ سب بزدل تھے، نہیں بزدل سے زیادہ مفاد پرست اور بے حس تھے۔
یہ واقعہ اگر لاہور یا کراچی جیسے بڑے شہر کے کسی پوش علاقہ میں ہوتا تو مانا جاسکتاہے کہ پڑوس کو بھی خبر نہیں ہوتی کہ ساتھ میں کیا ہورہاہے۔ مگر یہ تو خالصتاََدیہات اور قصبے میں ہونے والے واقعات ہیں۔ گاؤں میں تو درخت سے کوئی پتا بھی بے وقت گر جائے تو وہ شام تک بریکنگ نیوز کی طرح ہر چھوٹے بڑے کی زبان پر ہوتاہے۔
والدین نے کیا اپنے بچوں کو اتنی جرات بھی نہیں دی کہ جب پہلی بار کوئی بات ہوئی تو وہ اپنے والدین کو بتاسکتے؟ اساتذہ نے بچوں کے اندر اتنا بھی اعتماد پیدا نہیں کیا کہ وہ ایسی بات ہمت سے اپنے استاد کو بتا سکیں؟ کیا بچے کا اپنے والدین، استاد اور پڑوسی سے بھی بڑھ کر کوئی خیرخواہ ہوسکتاہے لیکن کیا اس خیرخواہی کا احساس بھی کبھی بچے کو دلایاہے؟ اگر بچہ مذکورہ ستونوں کے بارے اپنا خیرخواہ ہونے کا احساس رکھتا تو وہ کبھی بات کو نہ چھپاتا اور بات پہلے ہی واقعہ پر رُک جاتی۔
دس سال تک جاری رہنے والے ان غیر اخلاقی اور ظالمانہ افعال کو حکومت کی نااہلی کہہ کر بری الذمہ ہوجانا ہضم ہونے والی بات نہیں ہے۔ گزشتہ روز ایک نیوز چینل پہ ایک معروف اینکر پرسن نے اس طرف توجہ دلائی بھی ہے کہ یہ صرف پولیس اور سیاست دانوں کی ملی بھگت اور حکومت کی نااہلی ہی نہیں ہے بلکہ ان گھناؤنے واقعات کا طوعاََ کراہاََوالدین اور معاشرہ بھی ذمہ دار ہیں۔
آج میڈیا جو چیخ رہاہے تو اُس کو بھی اپنے طوراطوار پر غور کرنا چاہیے۔نیوز چینلز بھی ضابطہ اخلاق کی پابندی سے خود کو بری الذمہ سمجھتے ہیں۔ کسی نیوز چینل پر بچوں کے لیے ایک آدھا پروگرام تک دکھائی نہیں دیتا۔ کارٹون بھی پڑوسی ملک سے ہندی میں ڈبنگ ہوکر آرہے ہیں۔ ہمارے اپنے پاکستانی چینلز پر اخلاقی تربیت کا ڈھنگ کا ایک پروگرام تک دکھائی نہیں دیتا۔ نوجوان نسل کی راہنمائی کے لیے کچھ نہیں ہے۔حتیٰ کہ ہمارے اکثر پرائیویٹ چینلز کے ڈرامے بھی بے راہ روی اور جرائم کی حوصلہ افزائی کررہے ہیں۔ قناعت پسندی کے بجائے حرص ولالچ کا درس دیاجارہاہے۔
پنجاب پولیس کی کارکردگی اکثر ایسی ہی سامنے آتی رہی ہے۔ گزشتہ روز آئی جی کی آمد پر عوام کا غم وغصہ بتارہاتھا کہ پولیس نے بھی ان واقعات کے بڑھانے میں اہم کردار ادا کیا ۔ آئی جی مشتاق سکھیرا صاحب کی متاثرین اور اہل علاقہ کی موجودگی میں عین پریس کانفرنس کے موقعہ پر اپنے ماتحت آفیسرز سے معلومات لینا بھی بہت افسوس ناک عمل تھا۔ جب اتنے بڑے سانحہ کے سامنے آنے کے تین چار روز بعد بھی پولیس کے سب سے بڑے عہدیدار کی معلومات کا یہ حال ہوتو پھر باقی پولیس پر کیا تبصرہ کیا جاسکتاہے۔
حکومت پنجاب خصوصاََ خادم اعلیٰ پنجاب جو دردِدِل رکھنے والے انسان ہیں۔ اُمید ہے سب باتوں کو ایک طرف رکھ کر پوری سنجیدگی سے اس معاملے کو منطقی انجام تک پہنچائیں گے۔اور پورے انصاف کے ساتھ ملوث افراد کو قرار واقعی سزا دلوانے میں کوئی کسر نہیں چھوڑیں گے۔ رہے سیاست دان، خصوصاََ اپوزیشن تو اُن کاتو کام ہی ہوتاہے کہ سچی جھوٹی بیان بازی سے حکومت کو نیچا دکھائیں۔ اپوزیشن کی باتوں پر حکومتی سیاستدانوں کو سیخ پا ہونے اور شکوہ جواب شکوہ کرنے پہ وقت ضائع کرنے کی ضرورت نہیں۔
ہماری بحیثیت مجموعی اخلاقی حالت تویہ ہے کہ آج تیرہ جولائی ہے اور سوائے ایک آدھ نیوزچینل کے یہ واقعہ ایم کیوایم کے وقتی ونمائشی استعفوں کے شور میں گم ہوگیاہے۔ متاثرہ گاؤں کے علاوہ پاکستان بھر میں کسی جگہ سے ایسی اطلاع نہیں ملی کہ کہیں کوئی پانچ دس مذہبی یا غیر مذہبی افراد نے مل کر اس واقعہ پر احتجاج کیا ہو،کچھ بینرز لہرا دیئے ہوں۔
