\’\’مجاہد\’\’ڈی پی او اور بے حس معاشرے کی عدالت میں؟
کسی بھی معاشرے کی حقیقی تصویر کا انحصاراس کے نظامِ انصاف پر ہے۔ یہ جتنا مضبوط اور بروقت ہوگا معاشرہ اتنا ہی مضبوط اور خوبصورت ہوگا۔نا انصافی معاشرے کا سب سے بڑا ناسور ہے۔یہ تمام برائیوں اور قباحتوں کی جڑ ہے۔ ناانصافی پر کھڑے معاشرے میں کمزور حقیر اور طاقت ور عزت مآب سمجھا جاتاہے۔جہاں بے انصافی یا تاخیری انصاف سے معاشرے کی بنیادیں کھوکھلی ہوتی ہیں ، وہیں اس کے طفیل زن، زر، زمین کے جھگڑے خاندانوں کا شیرازہ بکھیر کے رکھ دیتے ہیں۔بھائی بھائی کا خون بہانے کے بہانے ڈھونڈتا پھرتاہے۔خون سفید ہوجانے میں لالچ کے ساتھ ساتھ بے انصافی کابھی بہت بڑا کردار ہے۔
ذیل میں ایک خاندان کی تباہی کا واقعہ بھی اسی ناانصافی، زر،زن،زمین، تاخیری انصاف اور معاشرے کی بے حسی کا منہ بولتاثبوت ہے۔29مئی2014ء دِن دیہاڑے پکی شاہمردان ضلع میانوالی کے رہائشی ریٹائرڈ اُستاد غلام شبیر کو اپنے سگے بھتیجے عامر عباس نے فائر مار کرقتل کردیا۔وجہ عناد یہ تھی کہ ماسٹر غلام شبیر نے اپنے بڑے بھائی ( عامر عباس کے والد) کو تقریباََ دو عشرہ پہلے ستمبر1995ء میں زمین کی تقسیم اور جھگڑاوغیرہ پر قتل کردیاتھا۔ اور اب کئی سالوں بعد عامر عباس نے اپنے باپ کے قتل کے بدلے اپنے سگے چچا ماسٹر غلام شبیر کو قتل کردیا۔
غلام یٰسین کے دو بیٹے ظفر اقبال اور عامر عباس باپ کے قتل کے وقت کم سن تھے۔ ماسٹر غلام شبیر اپنے بھائی کے قتل کے جرم میں گرفتار ہوئے۔پانچ سال جیل میں رہے۔ والدہ کی طرف سے معافی ملنے پر جیل سے رہائی ملی۔ دوسری طرف ماسٹر غلام شبیر کے دونوں بھتیجے جوانی کی دہلیز پر قدم آگے بڑھاتے رہے۔
قاتل و مقتول کے مشترکہ رشتہ داروں ،دوستوں اور کچھ سفید پوش حضرات نے صلح کے لیے کوششیں کیں مگر کئی سال تک صلح نہ ہوسکی۔مئی 2012ء میں ماسٹر غلام شبیر کے بھتیجے ظفر اقبال نے گورنمنٹ ایلیمنٹری سکول داؤدخیل میں دِ ن دیہاڑے ان پرقاتلانہ حملہ کیا لیکن ماسٹر شبیربال بال بچ گئے۔اس حملے کے دوسال بعد دوسرے بھتیجے عامر عباس نے مئی 2014ء میں دن دیہاڑے اپنے سگے چچا ماسٹر غلام شبیر کو فائر مار کر قتل کردیا۔جبکہ ابھی مقتول پر پہلے قاتلانہ حملے کے کیس کا فیصلہ نہیں ہوا۔ عامر عباس قتل کے بعد موقع سے فرار ہوگیا اور چھ ماہ گزر جانے کے باوجود ابھی تک گرفتار نہیں کیاجاسکا۔
مقتول ماسٹر غلام شبیر کے گھر پر موجود تین بزرگ بہنیں( غلام فاطمہ، گلائی خاتوں، اللہ وسائی)، بیوہ خطم انساء، بیٹی کنیز ام البنین بی ایس سی کی طالبہ او ر بیٹا فضل عباس جماعت ہشتم کا طالب علم پریشان حال ہیں۔ گھر کا واحد کفیل قتل ہوچکاہے۔ مقتول کی بیوہ اور بہنوں کا کہنا ہے کہ غلام شبیر کا قاتل عامر عباس دندناتا پھرتاہے۔اس نے اپنے بھائی ، والدہ، ماموں اور نانا وغیرہ کے ساتھ مل کر ہماری تقریباََ پچاس کنال زمین اور ٹیوب ویل پر بھی قبضہ کرکے ہمارے منہ سے روٹی کانوالہ بھی چھین لیاہے۔ قبضہ شدہ ٹیوب ویل بند پڑاہے اور اب واپڈا والے ٹرانسفارمر اور میٹر اُتارکرلے جانے کی کال دے چکے ہیں۔ انہوں نے کہاکہ قاتل اب بھی اپنے بھائی، والدہ، ماموں اور نانا کی پناہ میں ہوتاہے اور اکثر پکی شاہمردان میں موجود کچھ رشتہ داروں کے ہاں بھی اُس کا آنا جانا لگا رہتاہے۔مقامی پولیس ہمارے ساتھ بالکل تعاون نہیں کررہی۔ قاتل اور اس کے لواحقین وغیرہ جو ایک مجرم کے تحفظ میں ملوث ہیں ، ان پر پولیس کا کوئی خاص دباؤ تک نہیں ۔ اگر کبھی پولیس کسی کو تھانہ لے بھی جائے تو سیاسی مداخلت کا بہانا بنا کر چھوڑ دیتی ہے۔
مقتول کی بیوہ خطم انساء کا کہناہے کہ ہم خواتین تنہا انصاف کے حصول کے لیے کس دروازے پر دستک دیں، ہمارے پاس تو میانوالی ڈی پی او آفس تک جانے کے لیے پیسے تک نہیں۔ ہم گزر اوقات کے لیے دوسروں کے مرہونِ منت ہیں۔
مقتول کی بیٹی بی ایس سی کی طالبہ کنیز اُم البنین راقم کو مخاطب کرتے ہوئے کہتی ہے ، چاچو کیا اس ملک میں انصاف نام کی سوغات غریبوں اور بے سہارا خواتین کے لیے شجرِ ممنوع ہے؟کیا پولیس صرف پیسے اور عہدے والوں کی داد رسی کے لیے مامور کی گئی ہے؟ کیا اس ملک میں ایسا ظلم بھی قبول کر لیا جاتا ہے کہ ایک بیٹی اورکم سن بیٹے کے باپ، تین بزرگ بہنوں کے بھائی کو دن دیہاڑے قتل کردیاجاتاہے، پھر ان کی جائیداد پر قبضہ کرلیاجاتاہے۔ آئے روز بچوں کو قتل کردینے کی دھمکیاں دی جاتی ہیں۔آسمان گرتاہے نہ زمین پھٹتی ہے۔ معاشرہ چُپ سادھے رہتاہے۔ شہر کے مُلا و پیر اپنے واعظ و ذکر میں مصروف و مشغول رہتے ہیں۔سیاست دان غریب کے ساتھ کھڑا ہونے کے، طاقتور اور زیادہ ووٹوں والے کا طرف دار بنا رہتاہے۔کیا تصورِ اقبال اور خوابِ قائد ایسے پاکستان کاتھا؟کیا میں اپنی کتابیں جلا دوں؟ کیا میں اپنی بیوہ ماں، کم سن بھائی اور تین بزرگ پھوپھی ماؤں کو لے کر ڈی ایس پی تو کبھی ڈی پی او کے دربار میں پیش ہوں۔ لاہور جاؤں تو کبھی اسلام آباد انصاف کے لیے دَر دَر بھٹکوں اور دھکے کھاؤں ، تب کہیں جا کر انصاف ملے گا؟ میں صرف آٹھ ماہ کی تھی جب میرے پیارے بابا اپنے بھائی کے قتل کے الزام میں جیل چلے گئے، پانچ سال میں باپ کی شفقت اور صحبت سے محروم رہی۔ صرف ایک عشرہ ہی مجھے ابو کا ساتھ ملا، میرے بابا مجھے اعلیٰ تعلیم دلوانا چاہتے تھے مگر بیچ چوراہے مجھ سے میرے بابا کو چھین لیاگیا۔
جذبات میں لڑکھڑاتی زبان اوربہتے آنسو ناقابلِ برداشت ہوئے جارہے تھے۔ راقم نے حوصلہ دیتے ہوئے کہاکہ بیٹا صبر کریں، اللہ بہتر کرے گا۔ اللہ کوئی نہ کوئی راہ نکال دے گا۔ آپ پریشان نہ ہوں، اپنی تعلیم بھرپور انداز میں جاری رکھیں۔ آپ کے خاندان کی ساری داستان جب افسرانِ بالا اور خادمِ اعلیٰ تک پہنچے گی تو ضرور انصاف ملے گا۔ بس اب اسی سہارے پر یہ خاندان خوف و ہراس کے ماحول میں دِن رات کاٹ رہاہے۔
اس سلسلہ میں جب راقم کی تھانہ داؤدخیل کے ایس ایچ او سب انسپکٹر محمدرمضان سگو سے بات ہوئی تو اُس وقت مولوی عظمت اللہ خان، محمدنذیر سابق فوجی ملازم اور مقتول ماسٹر غلام شبیر کی بہن گلائی خاتون بھی موجود تھیں۔ ایس ایچ او نے یقین دہانی کرائی کہ ہم پوری کوشش کریں گے کہ قاتل جلد از جلد گرفتار کرلیں۔ مقتول کی خواتین لواحقین نے ڈی ایس پی رضااللہ خان تک بھی اپنی آواز پہنچائی ہے مگرنہ ابھی تک قاتل گرفتار کیاجاسکاہے اورنہ ہی زمین کاقبضہ دلایاجاسکاہے۔اب یہ مظلوم خاندان ڈی پی او میانوالی، آر پی او سرگودھا ، آئی جی پنجاب اور خادم اعلیٰ پنجاب سے انصاف کی اُمیدیں لگائے بیٹھا ہے۔
زمین کے بٹوارے اور گھریلو رنجشوں کے چکر میں پہلے بڑا بھائی چھوٹے بھائی کے ہاتھوں قتل ہوا۔ پہلے مقتول غلام یٰسین کی بیوہ نے اپنے بیٹوں کو مشکلوں اور اذیتوں کے ساتھ پالاپوسا، جوان کیا۔ مگر اپنے بیٹوں کے دِل سے اپنے باپ کے قتل کا دُکھ اور صدمہ نہ نکال سکی یا پھر یہ اُس نفرت کا کمال ہے جو ایک بیوہ اپنے دِل و دماغ میں پالتی رہی یا معاشرے کی تعلیم و تربیت کا شاخسانہ جس کے نتیجے میں پہلے مقتول کے ایک بیٹے نے اپنے چچا پر قاتلانہ حملہ کیا اور پھر دو سال بعد دوسرے بیٹے نے اپنے باپ کے قاتل اپنے سگے چچا کو قتل کردیا۔
اگر مقتول غلام یٰسین کی بیوہ اپنے بیٹوں کو اچھی تعلیم دلوانے میں کامیاب ہوجاتی، انتقامی اور جاہلانہ ماحول سے ان کو محفوظ رکھ پاتی تو شاید آج اِسے ایک بار پھر سے اذیت ناک صورتِ حال کا سامنا نہ کرنا پڑتا۔
ایسے ہی اگر ماسٹر غلام شبیر رہائی کے بعد اپنی بھابھی اور بھتیجوں سے صلح کے لیے دِ ن رات ایک کردیتا، اپنے حصے کی جائیداد تک اپنے بھتیجوں اور بیوہ بھابھی کے نام کرکے ان کی تالیفِ قلب کرلینے کی کوشش کرتا تو شاید یہ خاندان بکھرنے سے بچ جاتا۔
یا پھر ہمارا پنچائتی اور برادری کا نظام مضبوط ہوتا تو شاید پہلا قتل بھی نہ ہوتا یا کم ازکم دوسرے قتل سے پہلے صلح ہوجاتی۔ مگر ہمارے ہاں اکثر علاقوں میں پنچائتی اور برادری و قبائلی نظام بالکل ختم یا بہت کمزور پڑچکاہے۔ اس کے ساتھ دوسری جانب حکومتی نظام پولیس وغیرہ کی کارکردگی بھی سوالیہ نشان بنی ہوئی ہے۔جس کی وجہ سے عام آدمی کو انصاف کے حصول میں شدید مشکلات کا سامنا ہے۔ انسانی زندگی کا اہم اور لازمی حصہ یعنی معاشرہ بھی بحیثیتِ مجموعی بے حسی اور لاپرواہی کا منہ بولتا ثبوت ہے۔ ماسٹر غلام شبیر دِن دیہاڑے قتل کر دیئے گئے، کوئی گواہی دینے کے لیے تیار نہیں، بہنوں کی گواہی پر پولیس نے جن دو افراد کو ترجیح دی ان پر بھی مقتول کے لواحقین کو تحفظات ہیں۔
پورے شہر بھر سے صرف ایک ریٹائرڈ پاک فوج کا سپاہی اور پچیس کلومیٹر دُور موچھ قصبہ کے مولوی عظمت اللہ خان نامی شخص دامے درمے سخنے اس بے سہارا خاندان کو انصاف دلوانے کی کوشش کررہے ہیں ۔ مقتول کے شہر کے بڑے بڑے مبلغین اور واعظین مساجد و مجالس میں ظلم کے خلاف ڈٹ جانے کا درس دیتے نہیں تھکتے، ظالموں پہ لعنت کرتے ہوئے منہ سے جھاگ نکلتی نہیں رُکتی، شہر کے بڑے بڑے خیر خواہ جو اپنی ذات کے لیے کسی پہ بھی چڑھ دوڑنے میں دیر نہیں کرتے، آج سب کی زبانیں اور آستینیں بند ہیں۔شہر میں معمول کی چہل پہل دیکھ کے لگتاہے جیسے یہاں سب ٹھیک ہے۔ کہیں بے چینی نہیں پائی جاتی۔ آج تک میرے علم میں یہ بات نہیں آئی کہ شہر کے اہلِ ثروت اور اہلِ طاقت نے مل بیٹھ کے اس خاندان کی داد رسی کے لیے سنجیدگی سے سوچا ہو۔
جن معاشروں میں ایسی بے حسی اور جمود طاری ہو جائے وہاں غریب اور بے سہارا کا بس اللہ ہی واحد سہارا ہوتاہے۔ اللہ کے ہاں دیر ہے مگر اندھیر نہیں۔یاد رکھیئے مظلوم و مجبور کی آہ جہاں کسی فردِ واحد کو لگ سکتی ہے وہاں پورے معاشرے کو بھی اپنی لپیٹ میں لے سکتی ہے۔
