کراچی: پیپلزیوتھ سندھ کے ترجمان تیمو رعلی مہر نے کہا ہے کہ اٹھارویں ترمیم کو رول بیک کرنا خطرناک ثابت ہوگا،حکمرانوں کو ماضی سے سبق سیکھنا چاہیے موجودہ وفاقی حکومت کے ارادے خطرناک ہیں وہ اٹھارویں ترمیم ختم کر کے صوبائی حکومت کے اختیارات سلب کر نا چاہتی ہے جس کا نقصان خود وقاق کواٹھانا پڑیگا،اور ہم یہ باور کرانا چاہتے ہیں کہ اٹھارویں ترمیم کو ختم کرنے کی کوشش وفاقی حکومت کے خاتمے کا باعث بن سکتی ہے۔ان خیالات کا اظہار انہوں نے پیپلز یوتھ آرگنائزیشن کے دفتر میں کارکنان سے ملاقات کے دوران کیا، انہوں نے کہاکہ ہمارے قائدین نے پہلے بھی ملک کی خاطر اپنی جانیں قربان کیں اورجیلوں کی صعوبتیں برداشت کی ہیں ، اس لیے پیپلز پارٹی کے رہنماؤں پرجھوٹے اوربے بنیاد الزامات بنا کر انہیں ڈرایا اور دھمکایا نہیں جا سکتا اور یہ سب ہی جانتے ہیں کہ پاکستان میں آصف علی زرداری اور بلاول بھٹو سے بڑی سیاسی قد آور شخصیت کوئی نہیں ہو سکتی۔ انہوں نے کہاکہ تاریخ میں جمہوریت کے لیے دی جانے والی سب سے زیادہ قربانیاں پیپلزپارٹی کے لیے لکھی جاتی ہیں، اور ا ب توعوام بھی جان چکی ہے کہ پاکستان پیپلزپارٹی سے زیادہ عوام کا کوئی خیر خواہ نہیں ہو سکتا ۔انہوں نے کہاکہ عوام اس وقت مہنگائی ، بے روزگاری اور شدید معاشی بحرانوں کی وجہ سے دو وقت کی روٹی کے لیئے پریشان ہے جبکہ صدر پاکستان اسکردو میں پچاس لاکھ کا ناشتہ کرنے اور وزیراعظم ہیلی کاپٹر کے مزے لینے میں مصروف ہیں،حکمرانوں کی ان حرکتوں کی وجہ سے پاکستانی معیشت دن بدن خاتمے کی طرف جا رہی ہے لہذا اب تحریک انصاف کا چورن زیادہ دن بکنے والا نہیں ہے ۔ انہوں نے کہاکہ تحریک انصاف اب مزید عوام کی آنکھوں میں دھول نہیں جھونک سکتی ، پیپلز پارٹی کے وزراء دن رات عوام کی خدمت میں مصروف ہیں، سندھ کی عوام بلاول بھٹو کی قیادت اور حکومت سندھ کی کارگردگی سے خوش ہیں اور ایک لمحے کے لیئے بھی کسی اور جماعت کے وزیر کو برداشت نہیں کر سکتے ہیں ،تیمور علی مہر نے کہا کہ تحریک انصاف کی جانب سے عوام کے لیئے پچاس لاکھ گھروں کا شوشہ ملکی تاریخ میں سب سے بڑا اسکینڈل ثابت ہو گا، موجودہ حکومت کی ناقص معاشی پالیسیوں کی وجہ سے ملک میں پہلی مہنگائی کی لہر سے ہی عوام کی چیخیں نکل گئی ہیں تو وہ آنے والے مہنگائی کے طوفانوں سے کیسے لڑے گی۔ انہوں نے مزیدکہاکہ اٹھارویں ترمیم کے بعد سندھ حکومت نے عوام کی بے پناہ خدمت کی ہے اور ان ہی خدمات کے نتیجے میں سندھ بھر میں پیپلزپارٹی بھرپور انداز میں کامیاب ہوئی ہے۔
