۔۱۔تعلیم کی بنیاد نرسری ہے پانچویں نہیں
سرکاری سکولز میں خرابی کا سبب پرائمری سطح پر غیر معیاری تعلم کو قرار دیاجاتاہے۔ اس کے لیے ڈی ایس ڈی جیسا ادارہ کئی سالوں سے تگ و دو میں مصروف ہے۔ ایلیمنٹری کالجز میں ڈسٹرکٹ ٹریننگ اینڈ سپورٹ سنٹرز بنائے گئے ہیں۔پھر پندرہ کلومیٹرکے دائرہ میں کلسٹرٹریننگ اینڈسپورٹ سنٹرزہیں۔ جہاں ڈی ٹی ایز دس سے پندرہ پرائمری سکولزکے اساتذہ کوہرماہ راہنمائی فراہم کرتے اور کلاس سوم، چہارم اور پنجم کا امتحان لیتے ہیں۔مگر خرابی ہے کہ دُور ہی نہیں ہوپارہی۔ آج بھی جماعت پنجم پاس کرکے آنے والے اسی نوے فیصدطلبا جماعت ششم میں اُردو پڑھنے اور لکھنے سے قاصر ہیں، انگریزی تو دُور کی بات۔ مڈل اور ہائی حصہ کے اساتذہ سر پیٹ کے رہ جاتے ہیں۔ سرکاری اداروں کے ان طلبا کی بنیاد ٹھیک نہ ہونے کی وجہ سے یہ ہمیشہ کے لیے احساس کمتری کا شکار ہوکراکثر بھگوڑے پن کا شکار ہوجاتے ہیں۔اساتذہ حاضری کو یقینی بنانے کے لیے تگ و دو کرتے ہیں۔اساتذہ محنت تو کرتے ہیں مگربنیاد مضبوط نہ ہونے کی وجہ سے اکثر طلبا کے پلے کچھ بھی نہیں پڑتا۔پھر اساتذہ خود سزا سے بچنے کے لیے مڈل اسٹینڈرڈ اور میٹرک میں بہتر نتائج کے لیے نقل اور غیر قانونی ذرائع استعمال کرنا شروع کردیتے ہیں۔ مسئلہ دراصل یہ ہے کہ جہاں پرائمری تعلیم کو ذمہ دار قرار دے کر اس کی اصلاح کی کوششیں کی جارہی ہیں وہاں اصل نقطہ نظروں سے اوجھل ہے۔ یعنی بنیاد۔ پرائمری تعلیم بنیاد نہیں ہے بلکہ نرسری بنیاد ہے۔ اگر ڈی ایس ڈی اور محکمہ تعلیم کے دیگر ذمہ داران اس طرف غور فرمائیں اور نرسری ، اول اوردوم کو بنیاد تسلیم کریں جو کہ تسلیم کرنا بھی چاہیے تو یہ مسئلہ حل ہوسکتاہے۔ پانچو یں کے بجائے نرسری ،اول اوردوم کے امتحانات کا بورڈ تشکیل دیں۔بہتر ہے کہ نرسری، اول اور دو م کے لیے پرائمری تعلیم کانام استعمال کیا جائے اور تیسری سے آٹھویں تک کوایلیمنٹری تعلیم کانام دیاجائے۔ نرسری کلاس میں طلبہ کی زیادہ سے زیادہ تعداد پچیس اور اول ،دوم میں تیس تک مقرر کردی جائے۔ ان کلاسز کے لیے بہترین اساتذہ تعینات کریں۔ ان اساتذہ کو خصوصی الاؤنس دیا جائے اور غیر معیاری نتائج پر اساتذہ سے سخت باز پرس کی جائے تو ہم دیکھیں گے کہ بنیاد کتنی مضبوط ہوتی ہے اور اس پر کھڑی ہونے والی عمارت پھر کتنی مضبوطی سے استوار ہوتی ہے۔خدا را پرائمری تعلیم میں نرسری ، اول اوردوم کو بنیاد بنایا جائے ورنہ کبھی بھی بہتر نتائج کا خواب شرمندہ تعبیر نہیں ہوگا۔
۔۲۔ مسجد نہیں جائے نماز
ہمارے ملک میں روایت سی پڑگئی ہے کہ سڑک کنارے اور دیگر سرکاری جگہوں پر چند لوگ اچانک مسجد بنانے کا کام شروع کردیتے ہیں۔ چندہ والے بکس تین چار افراد کے ہاتھ میں تھما ئے اور سڑک کنارے بھی چندہ برائے مسجد کا بورڈ نصب کردا۔ راتوں رات مسجد بننے کا عمل تکمیل کی طرف گامزن ہوجاتاہے۔ اور پھر عموماََ چندہ کا عمل زندگی بھر جاری رہتاہے۔ ایسی مساجد بغیر مقامی گورنمنٹ یا ضلعی گورنمنٹ سے اجازت نامہ حاصل کیے بنائی جاتی ہیں۔ گورنمنٹ کو وہ جگہ جب کسی منصوبے کی توسیع کے لیے ضرورت پڑتی ہے تو پھر مولوی و متولی حضرات یہ کہہ کرعوام کو مشتمل کردیتے ہیں کہ دیکھو گورنمنٹ اب اسلام کے خلاف اقدام کرنا چاہتی ہے۔ لوگ بھی کچھ سوچے سمجھے بغیر اُٹھ کھڑے ہوتے ہیں جس سے اکثر گورنمنٹ کو پسپائی اختیار کرنا پڑتی ہے۔اس طرح ایک عوامی فلاح و سہولت کا ناگزیر منصوبہ مکمل ہونے سے رہ جاتاہے۔ پہلی بات تو علماکرام کو چاہیے کہ وہ واضح اعلان فرمائیں کہ ایسی مساجد غیر شرعی ہیں اور دوسرا حکومت تعمیر کے ابتدائی مرحلے ہی میں ایک غیر قانونی تعمیر کو روکے۔ہر یونین کونسل اور ٹاؤن کمیٹی کے علاقہ میں ہونے والی ایسی غیر قانونی تعمیرات کی تمام تر ذمہ داری ان اداروں کے ذمہ داران پر ڈالی جائے۔ اس کا یہ مطلب نہیں کہ مسلمانوں اور دیگر مذاہب کے لوگوں کے لیے اُن سے عبادات کی سہولیات ہی چھین لی جائے۔مسلمان کو چونکہ ہر روز پانچ وقت نماز کے ذریعے اللہ کے حضور سربسجود ہونا فرض ہے اس لیے جہاں کہیں مسلمان مسافروں کے لیے نماز وغیرہ کے لیے جگہ کا مقرر کرنا ناگزیر ہو وہاں مسجد کی بجائے جائے نماز کے نام سے احاطہ مقرر کردیاجائے۔ اُسے مسجد کا درجہ نہ دیاجائے۔ تاکہ بوقت ضرورت وہ جگہ کسی اور مقصد کے لیے استعمال کرنا پڑے تو کوئی مسئلہ پیش نہ آئے۔اس طرح سڑک کنارے چندہ کے زور پرگورنمنٹ کی دیگر ضروریات کے لیے مقررکی گئی جگہوں پر مساجد کی آڑ میں مدارس بنانے کے عمل کو روکنے میں بھی مدد ملے گی۔ اسی طرح جو اب مساجد گورنمنٹ کی اجازت کے بغیر دیگر ناگزیر ضروریات کے مقرر کردہ جگہوں پر تعمیر ہوچکی ہیں یا ہو رہی ہیں، اس کے لیے اسلامی نظریاتی کونسل ، اسلامیہ یونیورسٹی اسلام آباداور جامعہ الازہرجیسے معتبر اداروں سے رائے لے کر ان کو جائے نماز میں بدل دیاجائے اور ان کے ساتھ جہاں کہیں مدارس قائم ہوچکے ہیں اُنہیں قریبی آبادیوں میں منتقل کردیاجائے۔ دیگر ضروریات کے مختص جگہوں کو غیر قانونی مساجد بنانے کے عمل سے بہتر ہے کہ سڑک کنارے موجود اراضی کے مالکان سے زمین خرید کر مسجد وغیر ہ تعمیر کی جائے ۔ آج کل ہر بڑی شاہراہ پر فرلانگ دو فرلانگ کے فاصلے پر پٹرول پمپ بن چکے ہیں جن کے ساتھ مسجد اور ہوٹل وغیرہ کی سہولت بھی موجود ہوتی ہے۔ اس لیے غیرقانونی مساجد تعمیر کرنے کی ضرورت ہی نہیں۔مسافر پٹرول پمپس اور ہوٹلز کے ساتھ بنی مساجد سے بالکل آسانی اور بہتر طریقے سے فائدہ اُٹھاسکتے ہیں۔
۔۳۔گراؤنڈز اور پارکس
کھیل نوجوان نسل کو بے راہ روی اور دیگر جرائم سے بچانے میں اہم کردار ادا کرتے ہیں۔ شہروں کے اندر گورنمنٹ تفریح کے پارک اور کھیلوں کے لیے گراؤنڈز کاخصوصی طورپر انتظام کرتی ہے۔گاؤں ، قصبات میں سیرو تفریح کے لیے کھیت اور کھیلوں کے لیے کہیں نہ کہیں خالی جگہ مل جاتی ہے۔ مگر جب سے بے ہنگم آبادی کا بوجھ ہر گاؤں اور قصبہ پر بھی پڑاہے تو دیہاتوں اور قصبات کا حُسن بھی چھِن گیاہے۔ اب قصبات میں بھی چھوٹی چھوٹی تنگ گلیاں، سیوریج کا ناقص انتظام اور کھیل کود کے لیے جگہوں کا فقدان ہوچلاہے۔ اب تو کسان زمین کی ایک اوڑھ بھی نہیں چھوڑتا، جس پر سے عام آدمی آسانی سے گزر پائے۔خالی جگہیں چھوڑنے کا تو تصور ہی ناپید ہوگیاہے۔ شہر کے بچوں
کو تو آج ہرقسم کی تفریح و کھیل کی سہولیات میسر ہیں مگر قصبات کے نوجوان ان سے محروم ہیں۔ کم ازکم بڑے قصبے کے ساتھ گورنمنٹ ایک بڑا کھیل کا میدان مختص کرے۔ خواتین اور لڑکیوں کے لیے پارک بنائے جائیں۔ اب تو قصبات کی خواتین اور لڑکیاں چہل قدمی جیسی بنیادی ضرورت سے بھی محروم ہیں۔ بس اپنے گھر کی چھوٹی بڑی چاردیواری کے اندر قید ہوکے رہ گئی ہیں۔ اس لیے ان کی جسمانی بڑھوتری بھی مناسب نہیں ہوپارہی۔قصبات کی لڑکیوں کا کھیلوں میں بہت کم حصہ بھی بنیادی وجوہات میں سے ایک ہے۔ورنہ جس طرح گاؤں اور قصبہ کی لڑکیوں کی قابلِ رشک صحت ہوتی ہے وہ کھیلوں میں بھی اہم کردار ادا کرسکتی ہیں۔
آج قصبے کا غیرتربیت یافتہ نوجوان سارا دن فارغ ہوتاہے۔ کھیل کا میدان میسر نہیں تو موبائل کا میدان ہی ہاتھ آگیاہے۔ وہ سارا دن رات اب موبائل کو تفریح اور کھیل کا ذریعہ بنائے بیٹھا ہے۔ ایک فارغ نوجوان کا موبائل سے کیاکام ہوسکتاہے سوائے بے راہ روی اور وقت کے برباد کرنے کے۔ اگر ضلعی گورنمنٹ اس طرف سنجیدہ ہوتو ہر علاقے میں گورنمنٹ کے اراضی پڑی ہے۔ اگر نہ بھی ہوتو مقامی صاحبانِ ثروت کو ساتھ ملا کر جگہ حاصل کی جاسکتی ہے۔
پاکستان کے کئی قصبات اور کھیتوں کے بیچ سے شیرشاہ سوری روڈ کی خاصی لمبی چوڑی جگہ موجودہے جس پر مقامی کسانوں نے قبضہ جمارکھاہے۔ اُسے ہی واگزار کراکے بہت سی تفریحات اور کھیل کود کے لیے استعمال میں لایاجاسکتاہے۔
